Emser zî “Festîvala Kultur û Tebîetî ya Mûnzûrî” mabênê tarîxê 31 temmûz û 3 tebaxî de virazîyena. Nê çares serrîyê ke bi nê nameyî Dêrsim de na mihrîcane ronîyena. Mihrîcana dîyesine de ez zî şîbîya û mi zî standê Weşanxaneya Vateyî akerd bî.
Emser zî ez bi Tîyatroyê Bajarê Girdî ya Amedî reyde şîya. Nê tîyatroyî kayê tutan “Pîre û Luye” kay kerd.
Ez wazena derheqê nê festîvalane de tay çîyan vajî hema qala nê kayî bikerî.
A serra ke ez şîbîya û mi stand akerdibî zî û emser ke ez bi tîyatroyî reyde şîya mi hetê organîzasîyonê festîvale de zaf kêmanî dî. Nê çende serrîyê ke Dêrsim de festîvalî virazîyenê hema-hema nê kêmanîyî pêro zî heme festîvalane de virazîyenê. Hende serrî yê eynî çîyî çira digark (tekrar) benê?
Wexto ke ma stand akerdbi, di rojî ma cayê standî gêrayê ma bi zor cayêk tesbît kerd hema ma eşka stand akerê.
Emser zî ez ke bi tîyatroyî reyde şîya reyna mi eynî problemî dî. Seba tîyatroyê tutan “Yenî Mehla (Elî Baba Meh.” de ca dabî. Ma şî nê cayî ke cayo ti çi cayê! Binê çend tuyêranê girdan, serê rayîrê na taxe de bi.
Kaykerdoxî ke çim ginayê nê cayî moralê hemine xerepîya. Mecbur mendê nê rayirê na taxa birnayê û dest bi kayê xo kerdê. Erebeyêkê amey û şîyêne mecburî pabayê qedinayîşê kayî mendî.
Kay ke dest pêkerd da vîst tutî amebî. Bê nê tutan na des kesî zî keyeyê nê tutan ra yê pîlî bî.
Eke kêmanîya nê organîzasîyonî ra nêbînê seba nê kayî na festîvale firsetêko pîl bî. Çunke kaykerdoxî, nê kayê zaf mukmel kay kerdî.
Kayî ra dima ez bi xo kewta mîyanê nê tutan û mîyanê nê pîlan mi hetê ziwanî ra hemine ra persa.
Xo ra Dêrsim de kirmanckî wedarîya ya. Zafane zî mîyanê tutan de kirmanckî qisa nêbeno. La seba ke kayê tutan bi û kaykerdoxî zî serkewtebî mîmîkan ra zaf çîyî fehm kerdê.
La mi pîlan ra keyeyê nê tatan ra persê ziwanî ke kerd hema-hema pêro temaşekerdoxî cewabê pozîtîfan dayê.
Zaf rey tay kesî suhbetê xo mîyan de vanê kirmancê Dêrsimî kirmanckîya mintiqayanê bînan ra fehm nêkenê. Yan zî tersê nê tesbîtî kenê vanê, mintiqayê bînî fekê Dêrsimî ra fehm nêkenê!
No tesbît şaş vejîya. Mi kamcî pîlan ra persa, heme zî nê kay ra memnunî bî û zîwanî ra zî kesî gere nêkerd. Miheqeq çend çekuyî înan rê xerîb ame. No zî mi gora çîyêko normal hesibîyeno.
Eke nê îmakanî bivirazîyê nê festîvalane de hîna zaf tîyatroyê tutan û yê pîlan bi kirmanckî kay bikerê do ziwanê mintiqayan mîyan de yew têkilî bêro ronayîş. Û nê mintiqayan de zîwan bêro fehmkerdiş. Bê tîyatroyî sey govende sey musabeqeyê deyîran mîyanê tutan de bivirazîyo do nê têkilî hîna pêt bibo.