"Space X" ku kompaniyeke taybet e roja 30'ê gulana 2020’an du kes şandin fezayê. Ev bi ser bikeve dê rêwîtî ji bo mirovên din jî bidome.
Werin em hin agahiyan bidin ba hev:
- Dema Space X ji NASA'yê bi ser 3 mîlyar dolarî de pere digirt û ew roket çêdikir, li Amedê xelk ji bo çend qiruşan alîkariyê bigirin bi telefonê li Omer Dilsoz digeriyan. (1)
- Dema Elon Musk difikiriya piştî van her du kesan ka dikare çend kesên din bişîne fezayê, li Erzeromê du malbat bi çekan bera hev dabûn, 5 kes miribûn û difikiriyan ka em dikarin çend kesên din jî ji hev bikujin.
- Dema xebatkarên Space X dixebitîn roketê baştir saz bikin ku tiştek pê neyê, li Sêrtê kayûmê Pirtûkxaneya Celadet Alî Bedirxan a Şaredariyê xira dikir. (2)
- Dema xebatkarên NASA'yê li ser projeyê xeber didan, gelek kurdên me li ser weşanên yekser (zindî) nîqaşa “ka em çawa dikarin zimanê xwe ji mirinê xilas bikin” dikirin.
- Dema Musk li ser projeya şandina roketek din dixebitî, Cemil Oguz çîrokek evînî dinivîsand, Diyarnameyê bi Sîdar Jîr re li ser qunciknivîskarî diaxivî, hevalê me yê din ku nivîs redekte dikir pêşniyara lijneyê dikir ku “ev nivîs ne hêjayî weşanê ye.”
- Dema xwediyê Space X Musk ligel Tom Cruise li hev dikir ku li fezayê fîlmekî bikişîne, derhênerê kurd Kazim Oz nedikarî pere kom bike û fîlmê xwe yê nû temam bike.
- Space X berî roketê bi hewa bi xwe carek din li rewşa hewayê nêrî, nava xwe de nîqaş kir û ligel hewa ne baş bû jî got "vê carê emê bişînin" (27'ê mehê berî şandinê bi 16 deqîqeyan betal kiribûn); li cem me kurdan nîqaşên yekîtiyê xilas nedibûn, tu demê 'hewa baş nedibû' û Kobanî, bi hezar zehmetiyan hêviyeke biçûk dida kurdan, 'Em derbasî nîqaşa gava duyemîn dibin'.
- Dema Musk ji her du rêwiyan re digot, "Ji dîmena vê grestêrkê kêfê bigirin" li Heskîfê dîmenên xweş di bin avê de dihatin noqavkirin û xelkê wê derê dest ji kêfê girtinê berde, cih tune bû lê cih war bibin û ji xwe re konên ji naylonê çêdikirin. (3)
- Dema rêveberên Space X di nav nîqaşa “ka dikarin li fezayê zêdetir çi bikin” de bûn, li cem me gelek kes ketibûn dû Mucahit Bilici û Candan Badem ku ka kîjan ji bo kurdan baştir e, kî çi kiriye; bêyî ku pêdiviya kurdan bi her duyan jî hebe...
- Muskê ku asoya dinyayê vedikir, dinya ber bi cihek din ve dibir li aliyek bû, li aliyê din Biliciyê ku heta îro qet fêdeya wî ji bo tîpek kurdî jî çênebûye, di nav jiyana xwe de jî gelek caran pesnê cemaetê daye, dikir ku kurdan carek din ber bi cemaetê, lê vê carê ber bi cemaetek din ve bikişîne. Li aliyê din Candan Bademê ku tu fêdeya wî ji bo tîpek kurdî nebûye, wî jî dikir kurdan ber bi cemaetek din yanê ber bi cemaeta xwe ve bikişîne. (Bo Bilici ezê paragrafeke vekim, bila herikbariya nivîsê xira nebe, paragraf li jêr e...)
- Space X’ê heta niha gelek tişt şandin fezayê û bi vê kêfxweş dibû, lê yên me ji bo alîkariyek biçûk a ji Başûr diçû Rojava em kêfxweş dibûn.
- Dema Elon Musk navek ecêb li kurê xwe kiribû û ew û daîreya nifûsê ya DYA'yê di nav nîqaşê de bûn ka ev nav dibe yan na; dayikên kurd li bin peyarêyan, li navçeyên bav û kalên xwe li hestiyên zarokên xwe digeriyan.
- Ji rêwiyan yek dema xatir ji jin û zarokê xwe dixwest, henek bi zarokê xwe dikir, "Tu jî dixwazî werî?", li Amedê keça biçûk a Selahattin Demîrtaş ji diya xwe dipirsiya, "Dayê, dê kengê bavê min were?"
- Dema Musk zarokê xwe maçî dikir û dipirsî “tuyê jî bibe astronot?”, hevalên min li Stenbolê ji dibistanan nerazîbûn û li dibistanek baştir digeriyan ka zarokên xwe bişînin kîjan dibistanê...
Belê dem hat ser pirsa sernavê. Sernav? Hema nûçeya li ser Space X bixwînin (4) û dest ji sernavê jî berdin; jixwe waye me derdê xwe anî ziman
***
(Bi destûra we paragrafek ji bo Bilici ku me qal kir:
Bilici, di sala 2014'an de FETO wekî "Mirovên li Cemaeta Gulen di asta mirovên takva kirine de ne (5)" (27.04.2014, Taraf) bi nav dikir, hê sal ser re derbas nedibû vê carê ji bo wan wisa dinivîsand, "Bi rastî hûn wekî haşhaşiyan in (6)" (21.02.2015, Taraf) Hê çend meh neborî te ew ji ku birin ku...
Û ev Biliciyê ku hinek wî wekî entellektuel dibînin, êvara 2'yê gulana 2020'an beşdarî bernameya Dr. A. Incekan dibe, wekî gelek kesan nivîskar Ferzan Şêr jî pirsek dike. Dema dor tê pirsan pêşkêşvan Incekan pirsa Şêr wisa jê dike, "Ferzan Şêr nivîsiye dibêje gelo mamoste li ser mefhûma, mecaza Hamal Kurd disekine, xebatên me wek hemaltiyê nîşan dide yên kurda yê ku di te ya Hamal Kurd de, gelo dibêje em bi zimanê tirkî dikin çi tweet çi kitêb bin hemaltiya ji tirkan nîne? Cewabek kurt." Bilici wisa bersiva pirsê dide, "Eviya yanî zahîren, heta ku bêjin fikirkî netewperwer xuya dike, lê fikirkî ku, yanî alî…eee..yanî tiştekî bêedeb e". (7)
Ez paragrafa Bilici li vir digirim. Min xwest paragrafek ji bo Badem jî vekim, lê pêdivî pê nabînim. Gotina min li jor got têrê dike.)
2- Kayûmê Pirtûkxaneya Celadet Alî Bedirxan xira kir
3- Metin Yoksu: Kûsiyên Firatê û 50 hezar mirov dê li ku bijîn? (Hev. Cemil Oguz, Diyarname)
4- Rêwîtiya fezayê a taybet dest pê kir: Roket bi rê ket
5- Nivîsa Tarafê. Lê ji ber Taraf hatiye girtin linkek din ez didim, ev nivîs di faceya Bilicide jî heye.
6- Dîsa nivîs ji Tarafê ye, ji vê lînkê binêrin:
7- Bloga Ferzan Şêr:
Li ser vê gotina "Bêedeb" ya Bilici nivîskar Zinarê Xamo jî di bloga xwe de ev nivîsî "Mirovê alim gerek ne hêrsok be"
.jpg)
.jpg)
.jpg)
.jpg)
.jpg)
