HEWLER (DÎHA)

Partî û rêxistinên siyasî yên li Başûrê Kurdistanê bang li gelê Tirkiyê û Bakurê Kurdistanê kirin ku dengê xwe bidin Namzetê Serokomariyê yê HDP'ê Selahattîn Demîrtaş.

Li hemû deverên welat piştgiriya ji bo namzetê serokkomariyê yê HDP'ê Selahetîn Demirtaş herku diçe zêde dibe. Bi vê boneyê li Hewlêrê bi tevlîbuna partiyên siyasî û rêxistinên sivîl yên li Başûrê Kurdistanê, herwiha parlementerên YNK’ê û yên Goranê daxwiyaniyek dan çapemeniyê. Daxwiyanî bi pêşengiya Kongreya Netewî ya Kurdistanê (KNK) li nûnertiya PHD'ê ya Hewlêrê hate dayîn. 

Daxwiyaniya çapemeniyê destpêkê bi zaravayê soranî ya kurdî, ji aliyê endama KNK’ê Perwîn Seîd ve û piştre jî bi zaraveyê kurmanî jî ji aliyê Hindirîn Eşrefî ve hat xwendin.

'Demîrtaş nûnerê edalet û yeksaniyê ye' 

Endama KNK’ê Perwîn, bang li hemu gelê Tirkiyê kir ku dengê xwe bidin Demîrtaş û wiha dewam kir: “Em di wê baweriyê dene ku serkeftina Selahetîn Demîrtaş wê bibe serkeftina hemû gelên bindest ên li Tirkiyê. Ji ber ku ew nûnerê hemu aştîxwaz û bindestên Tirkiyê ye, nûnerê edalet û yeksaniyê ye. Eger îro kurdek bi nasnameya xwe ya kurdî bibe serokkomar, ev encama tekoşîn û xebata gelê kurd yê li Bakurê Kurdistanê ye.” 

Perwîn, di berdewamiya daxwiyanê de anî ziman ku, îro gelê kurd hişyar bûye û li hemberî şovenîzma Enqereyê em wê êdî serê xwe netewînin. Perwîn wiha pêde çû: “Bi berxwedana gelê kurd, ev sîstem şkestiye, ew hêzên ku destê aştî ji bo gelê kurd dirêj dikin wê bi serkevin. Di vê derê de mînaka Başurê Kurdistanê û Iraqê heye ku serok komarê Iraqê kurde." 

Perwîn, her wiha balkişand ser Şoreşa Rojavayê Kurdistanê û wiha domand: “Gelê me yê Rojavayê Kurdistanê bi xwîna xwe û îradeya xwe statuyek ava kiriye. Ne pêkane ku li hember zextan dev ji azadiya xwe berdin. Ji bo wê, pergala Rojavayê Kurdisatnê be baştirîn nimuneya pêkvejiyankirinê ya ji bo gelên rojavayê Kurdistanê ye.”

Herî dawî Perwîn got ku namzetiya serokkomariyê ya Demîrtaş wateya nûnertiya hemu gelên li Tirkiyê ye û wiha dawî li axaftina xwe anî: “Namzetiya Demîrtaş tê wateya nûnertiya hemû gelên Tirkiyê. Bi vê boneyê em hemû piştevaniya xwe ji Demîrtaş re radigihinin.” 

Navê partî û rêxistinên ku tevlî daxwiyaniyê bûne ev in: 

Bizutnameya Goran 

YNK (Yekitî Nîştîmanî Kurdistan)

Partî Zehmetkêşanî Kurdistan

Partî Ayindey Kurdistan

Bizutnamey Dîmokrati Geli Kurdisatn

Hizbî Rizgarî Kurdistan

Partî Komarî Kurdistan

Hizibeyti Nehre

Encumenî Komelgey Rêkxiraw Medeniyekan

Rekxirawi Sewzi Awrupî Kurdistan

Komelî Rewşenbîranî Mestudi Erdelan

Federasyona Zindanyanî Kurdistan

Rekxirawi Geyandin

Rêkxirawî Cotyarekanî Serdem

Wargeha Ş. Rustem Cûdî

Rêkxirawî Parastinî Jînge û Jin

Rêkxirawî Geşepêdan û Peresendin

Rêkxirawî Awedankiridni Kerkuk

Hizbî Şuî Kurdistan

Parti Parêzeranî Kurdistan 

Herwiha sê parlementerên parlamentoya Kurdistanê Bêger Telebanî, Miryemxan, Goran Azad jî beşdar bûn û piştgiriya xwe eşkere kirin.