Hewlêr
Beşdarên meşa ji bo şermezarkirina Parlementoya Iraqê hate lidarxistin û rastî êrîşê hat, îdîa kirin ku êrîş ji aliyê tirkmenan ve hatiye lidarxistin.

Ji bo şermezarkirina biryara Parlamentoya Iraqê, partiyên siyasî û rêxistinên sivîl yên li bajarê Kerkûkê, îro danê sibê meşek li dar xistin. Meşa ku bi 10 hezaran kes tevlî bûn, saet di 09:00’an de li ber deriyê Walîtiya Kerkûkê dest pê kir. Di derdora saet 10:15'an de di nava girseyê de kesek ku nasnameya wî ne diyar e, çalakiya xwekuştinî pêk anî.
Li gorî agahiyên ji rayedarên tenduristiyê yên Kerkûkê hatine bidestxistin, 25 kesan jiyana xwe ji dest da û zêdetirî 100 kes birîndar bûn. Di der barê teqînê de Wezîrê Tenduristiyê yê Herêma Kurdistana Federal Dr. Ziryan Osman, diyar kir ku rewşa birîndaran baş e. Piştî teqînê, hêzên ewlekariyê û polîsên bajarê Kerkûkê tedbîrên ewlekariyê girtin û li çar aliyên bajar kontrolên lêgerînê danîn. Berpirsê polîsên Kerkûkê Serhed Qadir, destnîşan kir ku hêzên ewlekariyê bajêr dorpêç kirine û di encama lêgerînê de 3 kesên biguman û nasnameyên wan nediyar, hatine binçavkirin.

Piştî bûyerê jî pevçûn derket

Li aliyê din hate îdîakirin ku li cihê bûyerê ji avahiyên derdorê kesên nasnameyên wan nediyar, gel gulebaran kirine. Tê gotin ku kesên ku gule barandine, ji eniya tirkmenan in. Piştî bûyerê li gor nûçeya Ajansa Eswat El-Iraqê, di navbera çekdarên nobedar yên Eniya Tirkmen û gelê sivîl de pevçûn derketiye û di encamê de 2 kes hatine kuştin, 4 kes jî birîndar bûne. Gel, îdîa kir ku nobedarên li avahiya Eniya Tirkmenan li pişt vê teqînê ne. Di encama bûyeran de avahiya Eniya Tirkmenan ya ku li nêzi cihê meşê ye, ji aliyê meşvanan ve hate şewitandin.

Şêniyên li bajarê Kerkûka Herêma Kurdistana Federal dijîn, bi armanca şermezarkirina zagona hilbijartinên herêmî ku çend roj berî niha ji hêla Parlementoya Iraqê ve hatibû erêkirin, li ber avahiya Walîtiya Kerkûkê gihîştibûn hev. Li hemberî girseya zêdeyî 80 hezar kesî, êrîş pêk hatibû.

Ji DÎHA'yê hatiye girtin