SÊRT
Şaxa KURDÎ-DER’a Sêrtê, di çerçeveya pîrozbahiya 15’ê Gulanê roja Cejna Zimanê Kurdî de daxuyaniya çapemeniyê a ku li darxist de da diyarkirin ku divê siyasedmedar û hevserokên şaredariyan di mijara perwerdeya Kurdî û azadiyê de ji dewletê nekevin nava bendewariyan û êdî xebatên xwe bi Kurdî bimeşînin.
Şaxa KURDÎ-DER’a Sêrtê di çerçeveya pîrozbahiha 15’ê Gulanê Roja Cejna Zimanê Kurdî de li pêş avahiya Şaxa ÎHD’ê a Sêrtê de daxuyaniyekî çapemeniyê a bi girseyî li darxist. Di daxuyaniya çapemeniyê de Hevserokê Şaxa KURDÎ-DER’ê yê Sêrtê Halîl Kaya, MAPER, TUHAD-DER, MKM, ÎHD, Meclisa Dayikên Aştiyê, Navenda Piştgiriya Jinana a Berfîn, rêveberên KESK’ê, rêveberên BDP’ê yên navçe û bajarên Sêrtê, Hevserokên Şaredariya Sêrtê Belkîza Beştaş Epozdemîr, Siyasetmedarê Kurd Selîm Sadak, endmaên Komeleya Xwendekarên Demokratîk yên Botanê û gelek kes tevlî bûn.
Di daxuyaniyê de pankartên bi nivîsa, “15’ê Gulanê Cejna Zimanê Kurdî pîroz be” û “Bi zimanê azad, ber bi nasnameya azad ve” hatin vekirin û dovîzên kes, sor û zer yên bi nivîsên, “şêrîn û xweşe zimanê Kurdî”, “Ziman giyanê hebûna me ye” û “Q,W,X” hatin hildan.
Hevserokê Şaxa KURDÎ-DER’a Sêrtê Halîl Kaya di axaftina ku li vir kir de, yekem ji bo malbatên 282 karkerên ku di cinayeta kar a li Somayê de jiyana xwe ji dest dayîn sersaxî xwest. Kaya da diyar kirin ku hikûmeta AKP’ê û dewlet li hemberî mafê herî bingehîn yê Kurdan perwerdeya bi zimanê dayikê polîtikayên xwe yên înkar û helandinê dimeşîne.
Kaya da diyar kirin ku divê ku siyasetmedarên Kurd û hevserokên şaredariyan di mijara perwerda bi Kurdî û azadiyê de nemînin li benda dewletê û êdî divê xebatên xwe bi Kurdî bimeşînin.
Daxuyanî bi dirûşme û tîliliyan bi dawî bû.