KOBANÊ

Heyeta ji Hikumeta Herêma Kobanê li ser vexwendina Hikumeta Tirkiyê îro hat bakûrê Kurdistanê.

Bi armanca gotûbêjkirina mijarên derbarê rê û rêbazên xurtkirina têkiliyên di navbera Tirkiyê û Rojava de, Hikumeta Tirkiyê bi awayekî fermî vexwendinameyek ji bo Hikumeta Herêma Kobanê şand. Li ser vê yekê îro şandeya hikumetê ku ji Hevserokên Meclisa Zagonsaz a Herêma Kobanê Fewziya Ebdî û Nîhad Ehmed, Wezîrê Karên Derve Ibrahîm Kurdo, Wezîrê Veguheztinê Hemze El-Mihemed, Endama Dîwana Meclisa Zagonsaz Zehra Seedûn, berpirsyarê komîteyên alîkariyên mirovî Silêman Xelîl û berpirsyarê têkiliyên hindirîn Umer Mihemed pêk tê hat bakurê Kurdistanê.

Berdevkê Kordînasyona Têkiliyên bi Rojava re Mazhar Zumrut, Hevserokê BDP'a Rihayê Celalettin Erkmen, Berendama Hevserokatiya Şaredariya Rihayê ya BDP'ê Leyla Akça, Wekîla Şaredarê Sirûçê  Hulya Demir, Berendamên Şaredariya Navçeyê yên BDP'ê Orhan Şansal û Zuhal Ekmez û Endamê Komîsyona Alîkariyê ya ji bo Rojava Faruk Tatli pêşwazî li heyetê kir. Heyet pêşî çû Şaredariya Sirûcê.

Şande dê van rojan bi rayedarên Hikumeta Tirkiyeyê û nûnerên partiyên siyasî re hevdîtinan pêk bîne. Di hevdîtinan de dê mijarên xurtkirina têkiliyên, hevkarî û cîrantiya di navbera her du aliyan bê gotûbêjkirin.

Wezîrê Karê Derve yê Hikumeta Herêma Kobanê Ibrahîm Kurdo da zanîn ku ev serdan li ser vexwendina Hikumeta Tirkiyeyê hatiye kirin. Kurdo got ku dê rê û rêbazên hevkariya civakî û aborî di navbera wan û Hikumeta Tirkiyeyê de bêne gotûbêjkirin.