Ehmedê Huseynî

1.

Ev helbest ji boyî te ye!

Tîp bi tîp porê te dibêje...

Hibra wê ji lêvên te dirije...

Ev helbest,

Peyvên xwe, 

bi destên te dikuje!

2.

Rûyê te esman e,

Refên qulingan 

ber bi zozanên sînga te ve 

koçber dibin!

3.

De biçurise hey taca serê welatan!

Guh nede xwîna darên xwe!

De li ser devê kêrê biçurise!

De xwe li hawirdora çiraya dilê min,

Mina pinpinîkekê li ba bike!

De biçurise, da ku ji bilî min

Tu kes, rondikên te paqij neke, 

Qamişloka minê!

4.

Vê sibehê,

Min xwe amade dikir

Da ku peyama bêrîkirinê 

ji te re binivîsînim......

lê peyama te 

berî ku dest pê bikim

gihîşt min!

5.

Rêça me dûr e, nelezîne!

Karwanê bîranînan rêberê me ye,

nelezîne!

Ka em xwe bigihîjînin dawiya şevê,

Ez ê ji te re bibêjim ji te hez dikim,

nelezîne!

Ji bayê ku li hinarikên te dixîne 

didexisim...

6.

Ji navê mirinê dema ku nêzî te dibe 

didexisim...

Ji rengan dema ku ne rengê çavên te bin, 

didexisim...

Ji welatan dema ku ne tu bî, 

didexisim...

Û ji bajaran dema ku ne Qamişloka min be, 

didexisim!

Azadiya Welat, 03.01.2014