HEWLÊR

Piştî du mehan Komîteya Amadekar ya Kongreya Netewî ya Kurd li bajarê Hewlêrê civiya. Piştî civînê Komîteya Amadekar daxuyanî da û ji ber taloqkirina kongreyê lêborîn ji gelê kurd xwest. Her wiha Kongreya Netewî taloqî dîrokek nediyar hate kirin.

Komîteya Amadekar a Kongreya Neteweyî ya Kurd îro di demjimêr 16.00’an li başûrê Kurdistanê li bajarê Hewlêrê piştî du mehan kom bû. Hevserokê Kongreya Civaka Demokratîk (KCD) Ahmet Turk, Endamên Desteya Rêveber ya KCK’ê Ronahî Serhat û Zekî Şengalî, Parlementera BDP’ê ya Qersê û endama Komîteya Amadekariya Kongreya Netewî Mulkiye Bîrtane, Serokê Giştî yê DDKD’ê Îmam Taşçier, Koordînatorê Giştî yê Înîsiyatîfa Azadî Adem Ozcaner û Omer Balekî, Nîlufer Koç, û Muhamed Hacî jî beşdarî civînê bûn. Her wiha beşdarbûna kesên wekî endamê polîtburoya YNK’ê û Serokê berê yê Parlamentoya Herêma Federal ya Başûrê Kurdistanê Ednan Muftî û Endamê Polîtburoya PDK’ê Piştewanî Sadik ku berê ne di nav Komîteya Amadekar de bûn jî hatibûn cihê civînê balkişandin.

Piştî civîna 3 demjimêran berdewam kir, Komîteya Amadekar ya Kongreya Netewî ya Kurd daxuyaniyek da û ragihand ku, “Biryar hatibû girtin ku, kongreya netewî di 25’ê vê mehê de pêk were, lê belê ji ber sedema hinek pirsgirêkên siyasî û netemambûna amadekariyan ew nikarin di dema diyarkirî de Kongreya Netewî ya Kurd li darbixin.”

Di daxuyaniya komîteya amadekar de hate gotin ku, “Em li ser navê hemû endamên Komîteya Amadekar ya Kongreya Netewî ku nûneriya partî û aliyên siyasî yên hemû parçeyên Kurdistanê dikin, lêborînê ji gelê Kurdistanê dixwazin.”

Komîteyê ragihand ku, “Ji aliyekî din ve tekez li ser wê yekê dikin ku wekî Komîteya Amadekar ji bo temam kirina pêwîstiyên sazkirina Kongreyê di demeke guncaw de dê karên xwe berdewam bikin. Em hêvîdarin ku pirsgirêk û giriftên siyasiyan bi diyalog û bi girîngî dayîna berjewendiyên bilind ên neteweyî bêne çareser kirin û ev jî ji bo sazkirina kongreyê bingehê xweştir dike.”

Komîteya Amadekar di dawiya daxuyaniya xwe de got ku, ji bo temamkirina pirsgirêkên heyî dê civînên xwe berdewam bikin.

Ev sêyemîn car e ji ber "Hin sedeman" kong tê taloqkirin.