QAMIŞLO

Rêveberiya Giştî ya Asayîşa Rojavayê Kurdistanê li ser gelek mijaran agahî da çapemeniyê. Asayîşê qala Hisên Şakir ê hatiye kuştin jî kir.

Rêveberiya Asayîşa Rojavayê Kurdistanê di civînek çapemeniyê de bîlançoya teqînên ku di nava 6 mehan de li seranserê Rojava pêk hatine, bûyerên di vê demê de çêbûne, eşkere kir.  Rêvebirê Asayaşiya Rojavaya Kurdistan Ciwan Îbrahîm diyar kir ku di nava 6 mehan de li seranserê Rojava 48 teqîn pêk hatine û eşkere kir ku 22 endamên Asayîşê dema bi erkê xwe radibûn jiyana xwe jidest dane.  Her wiha ji bo minasebeta Cejna Qurbanê 77 girtiyên ku ketin ber efûyê de serbest berdane.

Rêveberiya Giştî ya Asayîşa Rojavayê Kurdistanê derbarê bûyerên di nava 6 mehan de li seranserê Rojava pêk hatine, kesên di encama efûya cejna qurbanê serbest hatine berdan civîna çapemeniyê lidarxist. Di civîna çapemeniyê ku li navenda Giştî ya Asayîşa Rojava ya Qamişloyê hate lidarxistin, Endamê Rêveberê Asayîşa Rojava Ciwan Îbrahîm ji bo rojnamegeran axivî. Ciwan Îbrahîm diyar kir ku di nava 6 mehên dawî de li seranserê rojavaya Kurdistanê 48 teqîn pêk hatine û di encamê de 22 endamê wan jiyana xwe ji dest dane û wiha axivî: “Li Qamişlo tevî teqîna ku di encamê de Endamê Komîteya Dîplomasî ya TEV-DEM’ê Îsa Hiso jiyana xwe ji dest da 8 teqîn, li Dêrikê teqînek, li Amûdê  4 teqîn, li Dirbêsiyê teqînek, li Tirbespiyê 4 teqîn, li  Hesekê 14 teqîn û 5 bombe hatin betalkirin, li Til Temir 5 teqîn, li Çilaxa jî  7 teqîn, Li Girkê Legê jî 3 teqîn û li Efrînê 5 teqîn pêk hatine.’’

Ciwan Îbrahîm da zanîn ku di nava 6 mehan de 22 endamên wan di berxwedana li Rojava de şehîd ketine û wiha dom kir: “Li Dêrikê 3, li Çilaxa 2, li Tirbespiyê 2, li Kobanê 6, li Serêkaniyê 5,  li Hesekê 3 û li Qamişlo endamek me dema li ser erkê xwe yê parastinê bûn şehîd ketine.’’

Li Amûdê û Tirbesipiyê girtî neman

Rêveberê Asayîşê destnîşan kir ku hêzên wan li seranserî herêmên Rojava 77 girtiyên ku ketin ber efûya Dîwana Edelatê serbest berdana û wiha dom kir; “Hêzên me li Dêrikê 10, li Til Temir yek, li Hesekê 6, li Kobanê 8, li Efrîn 36, li Qamişlo 16 girtiyên ku ketin ber efûyê  serbest berdane. Di girtîgehên me yên li Amûdê û Tirbespiyê de tu girtî tune ne.’’

Lêpirsîna kuştina Hisên şakir didome

Derbarê Ciwanê bi navê Hisên Şakir ku di bûyerekê de ji aliyê Dewriya Gumrika Rojava ve hate kuştin îbrahîm ev agahî da; “Hisên di qaçaxiyê de kar dikir û dema ku li ser noqteyek Gumrika Rojava hêzên me xwestin rawestînîn, di navbera wî û endamên Gumrikê de pevçûn derket. Dema ku ketin erdê guleyek bi şaştî ji demançeya endamên gumrikê derketiye û jiyana xwe ji dest daye. Kesên di vê bûyerê cihê xwe girtine endamên gumrikê hîn girtîne û lêpirsîn hîn didome.’’

Di dawiya civînê de ciwan pirsên rojnamegeran bersivand.

ANHA