Ebdulah CELAN*

Karê rêncberiya havînê

Binivisînim bi evînê

Ew şûxlê rêncberiya berê

Bînime rojevê yanê

Amûr ên rêncberê çolê

Tev de rabûne ji holê

Min xwest bînime rojevê

Bo ciwan bikşînin balê

Ew rêncberya li pirêza

Genim didirûtin wekî gurza

Ji gurzan re digotin melû

Xasma li herêma Xerza

Tar û dasûk û him palik

Amûr ên pala bûn berkoşk

Ciyê bêhnvedana pala

Ji wî re digotin holik

Dema pala genim didirût

Li ber holkê dasûk disût

Serpale re digotin melek

Melek dida pala komût

Bo wî şûxlê dirûnê re

Digotin paleyî jê re

Dema genim ceh didirûtin

Dikirin diraxe pê re

Qesela genimê diraxê

Şixrebênî heman çaxê

Bi ker û axte şixre dikşand

Bi heywanan li ser rikaxê

Ew genim ceh tev bi şixrê

Pêk ve dikşande bênderê

Gêrevan jî gêre dikir

Yan bi gêrê yan bi cercerê

Gêrevanî gêre dikir

Wê qeselê hûrhûr dikir

Wê demê digotin ûre

Ûre bi milhêbê ba dikir

Bi milhêban ba dikirin

Zad û ka ji hev cûda dikirin

Genim û ceh dibirne malê

Tişta zêde çal dikirin

Min karê rêncberiyê nivsand

Him bi helbestkî jî weşand

Belku ciwan li ser rawestin

Bo lêkolîn wan pê hisand

13 Êlûn 2020

***

*Têbiniya Diyarnameyê: Em wekî malper helbestan naweşînin ji ber ku beşeke me ya bi vî rengî nîn e. Lê heta niha hin îstîsna çêbûne. Ev jî yek ji wan e.
Ebdullah Celan peyvên orjînal ên li nav gel di nav helbestên cur bi cur de bikar tîne. Di nav zimanê sewal û ajalan de, di nav karên din de bikar anîne. Ev jî di nav kar û barê paletiyê de ye. Piştî demekê ew dê van wekî pirtûkek çap bike. Me xwest wekî mînak be jî em vê bi xwendevanên xwe re parve bikin.
Foto: Rodî Yuzbaşi