Mehmet Yılmaz*

Gelî mivanê ezîz û bi rûmet, ez li ser navê Komelaya Nivîskarên Kurd ji bo beşdarbûna we ya merasima Xelata Rûmetê ji bo helbestvan Ehmed Huseynî, dibêjim: Hûn tevayî bi xêr hatin.

Em wekî Komeleya Nivîskarên Kurd, ji bo ked û xebata wî ya çandî û rewşenbîrî û bi taybetî ji bo fedakarî û dilşikestî wî ya ji bo Rojava, me ev Xelata Rûmetê layiqî helbestvan Ehmed Huseyni dît. 

Ey hosteyê helbestê, ey mîrê gotinê, ey nûnerê kurdan ê li dîwana felsefeya dinyayê, ey hogirê Heydger, Niçe û Spînoza, Ey mehkûmê sînoran, te di şevên tarî de sînor qetand û navê dayikê li vî welatî kir. 

Te got: 

Ne Serxet ne Binxet, ne Rojhilat ne Rojava, ne Başûr û ne Bakur; 

Navê vir Kurdistan e, Kurdistan!

Ey mamoste, em wekî Reveberiya Komeleya Nivîskarên Kurd li Amedê, dibêjin:

Ji bo ked û xebata te ya çandî û rewşenbîrî, ji bo şoreşgeriya te ya kurdistanî, tu yê vê diyariya me, li ser navê xwe, vê wekî xelata rûmetê û ji bo me jî; wekî ku me wezîfeya xwe ya biratiya Rojava tam bi cih neaniye, li ser navê biratiya Rojava, wekî lêborîna me qebûl bikî. 

Gelî rêzdaran,

Em ê îro pirsekê ji xwe bikin.

Gelo ji bo Rojava tiştê me kiriye bes e, yan ne bes e?

Eger em Bakurî, alman, îngilîz, ereb an afrîkî bûna, tiştê me kiribû bes bû. Lê mixabin em kurd in, em kurdên Bakur in...

- Gelo em zanin; Cegerxwîn, Celadet Elî Bedîrxan, Osman Sebrî, Nûredîn Zaza, Memdûh Selîm Beg û bi hezaran kurd gava li ser rûyê dinyayê cih ji wan re nema, li Rojava bûn mêvanê rûmetê?

- Gelo em dizanin; gava Rojava bi kul û kedera xemgîn dibe, bi çavekî tijî hêsir li Bakur dinêre?

- Gelo em dizanin; ku Rojava bi çavê birayekî mezin li Bakur dinêre?

- Gelo em dizanin; ku di şoreşa Bakur de heft-heşt hezar şehîdên Rojava hene?

De bibêjin xwişk û birano, îro tiştê ku me ji bo Rojava kiriye, bes e yan ne bes e? 

*Axaftina Serokê Komelaya Nivîskarên Kurd Mehmet Yilmaz ku di merasima Xelatdayîna Ehmed Huseynî de kir

***

Nûçeya eleqedar:

- Xelata Rûmetê ji bo Ehmed Huseynî