QAMIŞLO

Partiya Komunîstî Kurdistan tevlî Meclisa Gel a Rojavayê Kurdistanê (MGRK) bû. Partiya Hevgirtina Lîberalî Kurdistan jî wê di nava 2 rojan de biryara tevlîbûnê bide.

Bi munasebeta tevlîbûnê, nûnerên herdu partiyan û MGRK’ê li bajarê Qamişlo li hev civiyan. Di civînê de rêveberên Partiya Komunîstî Kurdistan, Partiya Hevgirtina Lîberîlî Kurdistan û MGRK’ê amade bûn. Di civînê de li ser geşedanên dawî yên li Suriyê û  Rojavayê Kurdistanê, her wiha êrîşên li ser herêmê û ambargo hatin nirxandin.

Di civînê de li ser projeya rêveberiya demî ya herêmê ku PYD’ê pêşkêş kiriye û hewldanên yekîtiya kurdan jî hatin gotubêjkirin. Di encama nirxandinan de Sekreterê Partiya Komunîstî Kurdistan Necmeddîn Mele Umer, destnîşan kir ku ew wekî partî tevlî MGRK’ê dibin. Rêveberên Partiya Lîberal jî destnîşan kirin ku ew ê tuzuk û rêziknameya MGRK’ê di nava xwe de nîqaş bikin û heta 2 rojan wê biryar bidin ka dê tevlî MGRK’ê bibin an na.