EFRÎN 

Hêzên Asayîşê 3 endamên partiya Azadî ku xwe li gundê Hesê yê girêdayî Efrînê weke koma çekdarî birêxistin dikirin, girtin binçavan.  Endamên koma çekdar ku kesê bi navê Ebdo Osman Seydo(51) rêveberiya wê dike li xwe mukur hatin ku hewl dane li dijî navenda YPG’ê êrîşê pêk bînin.

Hêzên Asayîşa Rojavayê Kurdistanê çend roj beriya niha 3 endamên partiya Azadî ku xwe li gundê Hesê yê Efrînê weke koma çekdarî birêxistin dikirin, girtin binçavan. Koma behsa mijarê ji aliyê kesê bi navê Ebdo Osman(51) ku di komîteya navendî ya Partiya Azadiye de cih digire, tê birêvebirin. Bi kesên ku hatin girtin re çekên mîna bombeyên destan û keleşînkof, her wiha bêtêl hatin girtin. Di lêpirsîna bi endamên koma behsa mijarê re li xwe mukur hatin ku carekê êrîşî navenda YPG’ê kirine, lê biser neketine û xwe amadekirine ku careke din êrîşî navendên YPG’ê bikin.

Çekdarê Azadî li xwe mukur hatin

Îtirafên çekdarên partiya Azadî ên gihiştine ber destê ANHA’yê wihane: Serokê Koma çekdar Ebdo Osman (51) ev tişt gotiye: ‘‘Mala min li taxa Şêxmeqsûd a Helebê bû. Ji ber şer û êrîşên hêzên rêjîma Baas ên li ser taxê, min koçî gundê Hesê kir. Li vir min endamên Partiya Azadî nas kirin. Di demekê de ez bûm endamê komîteya navendî ya Patiya Azadî li herêma Efrînê. Me komeke çekdar a ji 5 kesan ku ji ciwanên navçeyê pêk tê saz kir, rayedarên partiya Azadî Enwer Sîno, Esed, Luqman û Fayîq ku di heman demê de endamên tabûrên Selah Eldîn û Siqûr Efrîn in, ji me xwest ku em êrîşî navenda YPG’ê ya li nêzî gundê Hesê bikin. Li ser vê yekê me berê xwe da navendê. Berî ku em bigihêjin navenda YPG’ê me 2 endamên xwe şandin, gule li derdorê reşandin ku endamên YPG’ê yên di navendê de bitirsînin. Ji ber ku em di milê leşkerî de ne perwerdekirî bûn, em paş de zîvirîn û me êrîş pêk ne anî. Piştî ku çalakiya me ya li dijî navenda YPG’ê biser neket, me biryar da ku em di milê leşkerî de xwe perwerde bikin. Me li ser vê yekê berê xwe da nava zeviyan û me 2 rojan xwe li ser çekan perwerde kir. Em tirsiyan ku em bêne naskirin, ji ber vê yekê me dest ji zeviyan berda û me biryar da ku em berê xwe bidin Başûrê Kurdistanê da ku em ji aliyê pêşmergeyan ve bêne perwerdekirin û vegerin li dijî YPG’ê şer bikin.’’

Endamê komê Eymen Mistefa Sîno jî da zanîn ku hêzên Asayîşa Rojava çek di mala wî de girtine û ev tişt got: ‘‘Hêzên Asayîşê çek di mala min de girtin, çekên Nato, demançe û hin bombe bi min re hatin girtin. Ji ber ku ez endamê koma çekdar a Partiya Azadî ku ji aliyê endamê komîteya navendî ya partiya Azadî li Efrînê Ebdo Osman dihate rêveberin bûm, hêzên Asayîşê ez girtim binçavan. Em ê derbasî Bakurê Iraqê ( Başûrê Kurdistanê) bibana û em ê tevlî perwerdeya siyasî, îdeolejî û leşkerî bibana. Em ê tevlî pêşmergeyan bibana da ku em şerê YPG’ê bikin.’’

Eymen bang li ciwanan kir ku tevlî karên çekdarî nebin û da zanîn ku gelê kurd di vê demê de pêdivî bi yekîtiyê heye.

Endamê komê yê bi navê Mihemed Enwer Sîno di mukur hatina xwe de ev tişt gotiye: ‘‘Koma me ya çekdar ji 5 kesan pêk tê. Kesên bi navê Xelîl Sîno û Siyamend Ebdo Osman jî di nava me de cih digirin, karê yekê ku me pêk anî me gule li ser navenda YPG’ê reşandin. Fermana êrîşê ji aliyê  rêveberê koma me Ebdo Seydo pêk hat. Em 2 rojan li zeviyên nêzî gundê Hesê hatin perwerdekirin. Piştre rêveberê komê ji me re got ku em biçin Başûrê Kurdistanê da ku em tevlî pêşmergeyan bibin. Min ev yek qebûl ne kir. Min xwest ku ez li vir bimînim.’’

Mihemed Sîno diyar kir ku bavê wî jî endamê tabûra Siqûr Efrîne.

Ji ANHA'yê hatiye girtin