AHMET SUMBUL - DÊRIK
Li rojavayê Kurdistanê xebatên ji bo xweseriyê bi lez dewam dikin. Serokê Meclisa Gel a Rojava Yûsif Hecî der heqê xweserî û sîstema piştî got ku ew Sûriyeyê parçe nakin, lê dixwazin di nava 6 mehan de ji bo xweseriyê hilbijartinan pêk bînin.
Serokê Meclisa Gel a Rojava Yûsif Hecî da xuyakirin ku gava kurdan li Sûriyê dest bi şoreşê kirin armanca wan sîstemeke xweser bûye û destnîşan kir ku kurd bi tenê li herêmekê najîn, li bajarên cur bi cur bi hejmara sedhezaran dijîn.
Hecî ragihand ku niha li bajarên di destê wan de ne kurd xwe bi xwe bi rê ve dibin û got, "Me berî niha ji xwe îlan kiribûn ku projeya me xweserî ye. Ji xwe em xwe bi xwe bi rê ve dibin. Me ev projeya xwe li welatên din jî belav kiribû. Me derdê xwe ji wan re got. Destpêkê wan me fêm nekirin."
Hecî da xuyakirin ku, ew di şerê navbera rejima Sûriyê û Artêşa Azad de nebûne alî û kurdan li Sûriyê di nava şerê navxweyî de rêyeke sêyemîn hilbijartine. Hecî got, "Yan emê bibana alîgirên rejîmê yan jî bibana yê Artêşa Azad. Lê me her du jî qebûl nekirin. Me rêyeke sêyemîn danîn holê. Ji bo xwe bi xwe bi rê ve bibin, me dest bi şoreşê kir. Me destpêkê li dora xwe xelekeke ewlekariyê ava kir."
Yûsif Hecî diyar kir ku ji ber di şerê navxweyî yê li Sûriyê de ew nebûne aliyê tu kesî, hin welatan bi pêşdarî nêzî me bûne û wiha dom kir, "Lê hewldanên aştiyê yên Birêz Ocalan bi Tirkiyê re da destpêkirin deriyên ji aliyê Tirkiyê ve girtîbûn, hinekî vebûn. Tevî Almanya, Rusya, Îran û gelek welatên din ên cîhanê, me bi Tirkiyê re jî dest bi hevdîtinan kir. Lîderê PYD'ê Salih Muslim gelek caran diçe Tirkiyê. Hevdîtinên me dewam dikin. Lê belê dijminên me yên ji vê rêveçûna baş aciz in, bi rêya komên radîkal ên îslamî êrîşî me dikin. Ji bo em qels bibin, çi ji destê wan tê, dikin. Lê hêzên YPG û YPJ'ê rê nadin van. Niha bi hezaran jin û xortên me yên ciwan li refên YPG'ê, nahêlin dijminên me xwe nêzî sînoran bikin. Derdê komên radîkal ên Îslamî dagirkirina herêma me ye. Lê emê tu carî destûrê nedin. Rewşa me roj bi roj baştir dibe. Piştî ku me herêma xwe ji van çeteyan xalî kirin, rewşa me wê baştir bibe."
BINGEHA XWESERIYÊ TEMAM E
erokê Meclisa Gel a Rojava Hecî da xuyakirin ku wan bingeha xweseriya demokratîk a kurd, ereb, êzidî, misilman, xiristiyanan di nava xwe de vedihewîne, temam bûye û ew derbasî qonaxa duyemîn bûne. Hecî got, "Me di 21'ê tîrmeha 2012'yan de hêzên rejîmê ji herêma xwe derxistin. Hingî barê me girantir bû. Ji ber ku xizmetên aborî, civakî, siyasî, perwerdeyî, binesazî, hemû li ser piyê me man. Ji ber vê yekê me bi lezgînî komîte ava kirin. Ev komîte, ji bo xizmeta gel seferber bûn. Ji bo gel pirsgirêkên di nava xwe de hal bike, me dadgehên gel ava kirin. Li herêmên çolter wekî gundan jî, di şûna dadgehên gel de malên gel hatin avakirin. Piraniya pirsgirêkan li vir çareser bûn."
Hecî ragihand ku wan li Rojava amadekariyên xweseriya demokratîk xelas kirine û ji bo çareseriya her şêweyên pirsgirêkên derkevin holê, wan komîte ava kirine. Hecî diyar kir ku bêyî cihêkariya ziman, ol, nijad bê kirin wê her kes karibe di rêveberiyê de cih bigire û di nava 6 mehan de jî wê bi hilbijartinekê Parlamentoya xwe ji bo tevahiya cîhanê îlan bikin.
RÊVEBERIYA XWESER JI BO TU WELATÎ NE GEF E
Hecî da xuyakirin ku rêveberiya xweser a li Rojava ji bo tu welatî ne gef e û ew naxwazin Sûriyeyê parçe bikin û wiha peyivî: "Bi tenê, ji bo em gelê xwe biparêzin, em rêveberiyeke bi vî rengî ava dikin. Tirkiyeyê destpêkê em nas nedikir. Lê belê serdanên Salih Muslim ên li Tirkiyê gelekî bi bandor bûn. Em cîranên Tirkiyê ne. Îranê jî banga hevdîtinê li me kir. Li wê derê jî Birêz Muslim hevdîtin kir û rewş rave kir. Êdî welatên din bi çavekî erênî li rêbaza rêveberiya me dinêrin. Piştgiriyê didin şerê me yê li dijî komên radîkal. Ji ber ku Îslamperestên radîkal ji bo Tirkiyê û welatên herêmê xetere ne. Tevî Tirkiyeyê divê tu welat me wekî gefê nebînin. Mîna ku Birêz Ocalan dibêje, tevahiya cîhan bibe dijminê me jî, emê nebin dijminê wan. Lê eger êrîşî me bikin, emê tu carî serê xwe netewînin, heta dawiyê li ber xwe bidin. Emê bibin dostên her kesî, destê xwe yê aştiyê her tim dirêj bikin. Di asta yekemîn de daxwaza me ya bingehîn a ji Tirkiyê, vekirina deriyên sînor e. Ji ber ku mirovên me di gelek waran de zor û zehmetiyan dijîn. Ji bo pêdiviyên sereke yên jiyanê bên çareserkirin divê deriyên sînor tavilê bên vekirin."
ANF
***
Nivîsa Ahmet Sumbul a din ku ji Rojava nivîsîbû:
- Ji eniya Serêkanî-Til Xelef çend not