Bedel Boselî
Navê, berpirsê Rûdaw TV yê Enqereyê Erdal Şîmşek e. Fermo em berê xwe bidin çend gotinên wî yên ku di rojnameyek din a faşîst û tirkperest de:
"PKK partiyek terorîst û xwînrêj e. Niha bi çend hestiyên avêtine ber, (wek segan) qanî bûye". (Erdal Şîmşek, Rojnameya Mîlat, 02.10.2012)
"Şerafettîn Elçî mirovek xwînmêj e. Dixwaze kurd bibin xulam, evd û kuçikên wî". (Erdal Şîmşek, Rojnameya Mîlat, 02.10.2012)
"Îstîqbarata me (Parastina Tirkiye, MİT) wesa zîrek e ku rengê derpiyê li ber (herdu rêveberên PKK) Fehman Hûseyn û Sabrî Ok dizane. Divê wan bîne û li pêş çavên me dadgeh bike". (Erdal Şîmşek, Rojnameya Mîlat, 22.08.2012)
"Ez û Şemdin Sakik (endamê MÎT'ê) dostên hev in (...)"(Erdal Şîmşek, Rojnameya Mîlat, 17.09.2012)
"Yên ku PKK'yê ji nêz nas dikin dizanin ku rêxistineka xwedî bingehek faşîst û dij-rewşenbîrî ye. Îdeolojiya wê, ji têkeliya BAAS û Stalanîzmê ye. Di rojhilatê Navîn de rêxistineke ku faşîsttirîn, reştirîn û mezintirîn dijminê mirovahiyê ye. Bi vî awayî, ji rêxistina Hasan Sabbahî "Haşhaşiyan" paşverûtir e. We rastî bivê, Xwedayê nûdem Abdullah Ocalan ji Xwedayê sedsala 12'yê Hasan Sabbahî dijwartir û zordesttir e. Ocalan dixwaze kurd tenê jêre bibin evd û baweriyê bi ayetên wî bînin." (Erdal Şîmşek, Rojnameya Mîlat, 22.08.2012)
Berî çend rojan Rûdaw TV'yê dest bi weşana xwe kir û min bi xwe hez jê kiribû. Çi li ser Başûr, çi li ser Rojava, çi Rojhilat û Bakur bi bernameyên xweş, weşanek baş dike. Niyeta min hebû ku di vir de nivîsarekê ji bo danasîna Rûdaw TV'yê biweşînim û bi rêya gelek malperên din jî kêmahî 100 hezar kes bixwînin. Ev xwestek tenê helwestek neteweyî bû. Lê mixabin ew viyan û şiyana min şkest, êdî dilê min nagire ku temaşe jî bikim.
Serê sibê ji bo kar, ji Gazî Mahallesî ber bi Taksîmê ve diçûm. Min di rêde guh dida Rûda TV'yê, wek her spêdê. Dema nûçegihanê Enqereyê hat ser û pesnên Tayîp Erdoganî digel ahagiyên nerast dan, ez ketim nav şik û gumanan. Wiha digot: "Piştî ku serokwezîr Erdoganî got xwepêşanderan herin mala xwe... Komelê guh dayê û dest ji çalakiyan berdan. Êdî pir hindik kes, 300-400 kes li kolanan mane...". Û digel van ahagiyan gelek agahiyên din ên derewîn didan. Ew derewên Medyaya Tirkî dike dubare dikirin. Rûdaw TV di 2 deqîqeyan de, kir reklamxaneya Recep Tayîp Erdoganî. Bi rastî pêşkêşvanê li Hewlêrê jî hinek şaş ma, min lê anî der. Ez ji şîrove û nêzîkbûna wî nûçegihanî ketim nav gumanan û min dûvçûnek li ser kir.
Ka niha em berê xwe bidinê Televîzyona Rûdawê ya ku pesnê xwe bi kurdewarî û netewetiyê dide, ya ku dibêje "em dengê her kurdekê ne" mirovek çawa kiriye berpirsê xwe yê Enqereyê:
Navê wî Erdal Şîmşek e. Ji rojnamevaniyê pirtir mîlîtanê Erdogan û Cemeeta Gûlenî ye. Pirtûkên wî jî hene ku têde kurdan wekî terorîst, xwînmêj dide nasîn, dewleta Tirkiye wekî pîroz pêşkêş dike. Di nav re xwe li ber Barzaniyan û Başûr şirîn dike. (Lîstika dewleta Tirk a klasîk). Di rojnameya tirkperestan a faşîst de, PKK'yê wekî "Partiya terorîst", gerîlayan "dewar", rêveberên PKK'yê "kuçik", "kujerê zarokan" bi nav dike. Rehmetî Şerafettîn Elçî jî wekî mirovek "xwînmêj" û "bê şeref" dide nasîn. Ji bo parastina (îstîqbarata) Dewleta Turkiye jî dibêje "Îstîqbarata me". Ji kurdên serhilder re dibêje "kafir" û "xwînrêj".
Hûn dikarin hinek nivîsarên wî ji vir bixwînin:
http://www2.milatgazetesi.com/yazarlar.asp?yid=25
Ez di wê baweriyê de me ku rêveberiya Rûdaw TV, ya ku nêzî birêz Barzanî hay ji van kiryarên vî kesî heye. Ango dizanin ka çi tovemirov e. Ya herî balkêş ew e ku kurdî baş nizane lê dîsa ew kirine berpirsê vî karî. Lewre tê heye ku di rêveberiya Rûdaw TV de dostên wek xwe hebin.
Qet nebe, xebatkarên Rûdaw TV, yên welatperwer û bi rûmet bila vê rûreşiyê li ser xwe qebûl nekin, nebin hevkarên van mirovên dijkurd, kesên êrîşê tînin ser şeref û namûsa me kurdan, divê helwesta xwe şanî rêveberiya Rûdaw TV bidin. Her wekî din taybet bila tevger û rêxistinên Bakur û Rojava hay ji vê metirsiya kûr hebin.
Sed heyf û mixabin lewma Rûdaw TV taybet li Bakur mirî ji dayik bû
Ji Yuksekovahaberê hatiye girtin
.jpg)
