Diyarname
Komeleya Nivîskarên Kurd ji bo Alî Fîkrê Işik daxuyaniyeke nivîskî weşand, banga piştgiriya wî kir. Daxuyaniya komeleyê wisa ye:
"Nivîskar û rexnegir Alî Fîkrî Işik ji ber helwesta xwe ya reda wijdanî careke din hate girtin.
Xuyaye dadgehên li Tirkiyê hîn jî bi feraseta berê tevdigerin û ji bo kurdan tu şert û mercên ku hatibe guhertin tuneye. Hebûna dadgehan li ser serê kurdan wekî şûrekî desthilatdariyê ye. Ev çend salên dawî bi hezaran siyasetmedar, rojnameger, nûner û rêvebirên saziyên sivîl bi biryarên heman dadgehan bi beleheq û belesebep tên girtin. Em baş dizanin ku ev saziyên desthilatdariyê bi van nêzikayiyên xwe dixwazin kesên zane, aktîvîst, çalak û hişbîr pasîvîze bikin û erka xwe ya ku dibin dest û emrê hikumetê bi vî awayî bicih bînin. Bi vê biryara xwe ya dawî ku Alî Fîkrî Işik şandin girtîgehê vê misyona xwe careke din eşkere kirin.
Em hemû dizanin li tu derê dinyayê kesên wijdanê civakê ne li hemberî neheqiyan bêdeng nemane û serî danenîne. Nexasim ew kes rewşenbîr û nivîskarên civaka xwe bin.
Tiştên ku her kes dizane û dijî emê li vir dubare nekin. Bi kurtayî, heta Alî Fîkrî Işik bê berdan emê nobeta wî ya ‘wijdanî’ bigirin û ji bo bê berdan jî çi ji destê me bê emê bikin. Daxwaza me ew e ku nivîskar û rewşenbîrên kurdan jî ji bo helwesta Alî Fîkrî Işik ku parastina xwe bi zimanê xwe dike bêxwedî nehelê û ji bo piştgiriyê metodên cur bi cur bikarbîne.
Emê heta Alî Fîkrî Işik bê berdan piştgiriya xwe destnîşan bikin û raya giştî jî hayidar dikin ku xwedîliderketina li Alî Fîkrî Işik xwedîliderketina wijdan, ziman û azadiyeke bi rûmet e."