Li bajarê Silêmaniyê kanala NRT ya girêdayî şîrketa Nalia cara duyemîn rastî êrîşê hat. Şeva din bi bombeyê êrîşê ofîsa sereke ya NRT’ê kirin.
Duh komek welatiyên alîgirê Partiya Demokrata Kurdistanê (PDK) li ber ofîsa sereke ya kanala asîmanî NRT’ê kom bûn û bi boneya ku NRT'ê di bernameyeke xwe de ‘bêrêzî li hemberî Mele Mistefa Barzanî’ kiriye, nerazîbûn nîşan dan.
Li gor saeta Herêma Kurdistanê derdora 16.00’an komek welatî ya ku hejmara wan zêdetirî 250 kesan bû li ber şîrketa Nalia kom bûn û nerazîbûn nîşan dan.
Kanala NRT’ê jî li ser ekranên xwe ragihand ku bi bombeyê êrîşê ofîsa sereke a wan hatiye kirin. Rêveberê navenda nûçeyan Nalya Rebuvar Mihemed jî derbarê êrîşa bombeyî de wiha got: “Demek dirêj e li ser televîzyona me êrîş hene. Em van êrîşan li hemberî azadiya raman, mafê agahdarkirina gel dibînin. Nalya TV dengê gel û kolananê ye. Dixwazin bi van êrîşan dengê me qut bikin. Ji niha û şûn de jî di warê ewlekariyê de ne diyar e ka dê çi bê serê xebatkarek me. Hikumet û hêzên ewlekariyê ji vê yekê berpirs in.”
Piştî ku gelek welatî li ber ofîsa NRT’ê kom bûn û teqîna bi bombeyî pêk hat, hêzên ewlekariyê gihîştin cihê bûyerê û tîmên ewlekariyê dest bi lêkolînê kirin.
NRT’yê jî di daxuyaniyekê de daxwaz ji PDK’ê kir ku helwesta xwe ya fermî li ser vê rewşa duh rûda diyar bike. NRT’yê diyar kir ku parastina hemû karmendên televîzyona wan li ser stûyê PDK û Hikumeta Herêma Kurdistanê ye.
Di bernameya bi navê ‘Maykî Xelk-Mîkrofona Gel’ a televîzyona NRT'yê de kesekê bi rêya telefonê ‘xeber û dijûn’ daye Mela Mistefa Barzanî. Ji ber vê yekê jî alîgirên PDK’ê li derdora kanalê kom bûn û nerazîbûn nîşan dan.
NRT’yê di daxuyaniya xwe de derbarê vê yekê de wiha got: “Ger di bernameya me de xeletiyek diyarkirî derbasbûyî be, divê hewara xwe bigihînin rêyên yasayî û dadgehê. Ne ku bi rêya xwepêşandan û avêtin ser dezgeha me, vê yekê çareser bikin. Ji ber ku rêxistina zextên bi vî awayî, azadiya ragihandin, jiyana siyasî û demokrasiya Herêma Kurdistanê dikeve bin pirsiyarê.”
Kanala NRT di sala 2009’an de dema nû dest bi weşana xwe kiribû jî rastî êrîşê hatibû. Wê demê ofîsa sereke ya li Silêmaniyê ji aliyê grûbeke çekdar ve hatibû şewitandin; hemû amûrên teknîkî hatibûn şewitandin, zerar û ziyanek madî bi xwe re anîbû.
Ji ANF'ê hatiye girtin
