Diyarname
Nivîskar Yildiz Çakar vê carê bi pirtûka xwe “Derî” ku ji Weşanên Avestayê derket, derket pêşberî xwendevanên xwe. Pirtûk niha li Fûra Pirtûkan a Stenbolê li benda xwendevanên xwe ye.
Di nav Weşanên Avestayê de beşa Şahmaran pirtûkên nivîskarên jin ên kurd diweşîne. Şahmaranê ku heta niha 20 pirtûkên nivîskarên jin ên kurd weşandibû yeka din lê zêde kir: Derî.
“Derî” pirtûka nû ya Yildiz Çakar e.
Weşanên Avestayê di heman demê de diyar kiriye ku ji sala 2011’an ve tenê helbestan di beşa Şahmaranê de diweşînin. Û pirtûka Derî jî pirtûka helbestan e ku lê zêde bûye.
Niviskar Yildiz Çakar di sala 1978’an li Amedê hatiye dinyayê. Xwendina xwe ya seretayî, navîn û lîsê li Amed û Mersînê domand û temam kiriye. Paşê Saziyên Tenduristiyê xwend. Çakar ku demekê di Azadiya Welat û DÎHA’yê de karê rojnamegerî jî kir, ji bilî helbest û çîrokan gelek ceribandin û çîrokên senaryoyê jî nivîsandine. Ew niha endama PEN’a Kurd û yek ji endamên avakar a Komeleya Nivîskarên Kurd e. Heta niha du kitêbên wê hatine çapkirin. Hinek helbest û çîrokên wê li derveyî welêt bi zimanê erebî jî hatine weşandin. Helbestên wê bi navê “Goristana Stêrkan” (Weşanên Elma, Stenbol, 2004) û çîrokên wê jî bi navê “Ala” (Weşanên Yekîtiya Nivîskarên Duhok) çap bûne.
Ji pirtûkê:
Di navbera derî û dilê xwe de mam
Li aliyekî tu
Li aliyekî derî
Ne destê min ji derî dibû û ne jî ji destên te.
Min çend payizên sar germ kirin,
Ji bo her tiliyên te
Derî / Yildiz Çakar / Helbest / 64 rûpel
***
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.