Culemêrg
Li Culemêrgê komeleya ku dê li ser ziman û çanda kurdî xebatê bidomîne bi navê ZIMAN-DER vebû.

Merasima vekirina Komeleya Lêkolîn û Pêşvebirina Çand û Ziman (ZIMAN-DER) ku cihê wê li ser Kolana Bulvarê ye li dar ket.

Gelek kesên li ber avahiya DEM Partî ya bajêr hatin ba hev bi def û zirneyê ber bi cihê komeleyê ve meşiyan.

Mebûsê DEM Partî yê Culemêrgê Onur Düşünmez axivî û got, "Bi sedan salan e êrîşên hovane li ser kurdan hene. Xwestin ziman, çand û hebûna me têk bibin. Ger bi sedan salan e em ziman û çanda xwe diparêzin, ji niha û pêde jî berdel çi dibe bila bibe emê biparêzin. Di sala 2016'an de dema bi kayûmê dest danîn ser Culemêrgê, gava pêşî saziyên ku li ser zimanê me kar dikirin girtin. Piştî 10 salan bi pêşengiya gelê Culemêrgê me dîsa saziya vekir."