Diyarname
Saleke nû hat û kurd di sala nû de wê çi bikin? Mijarên sereke yên kurdan wê çi bin? Me hin dan hev. Kerem bikin:
NOTÊN JI BO ROJAVA
- Li Rojava meseleya sereke têkiliya ligel hikumeta demkî ya Şamê ye. Par 10'ê adarê ligel Serfermandarê Giştî yê HSD'ê Mazlum Abdî û Serokê Demkî yê Şamî Şara peyman hatibû girêdan. Piştî vê ev peyman hê jî neketiye nava zagonan û nîqaş didomin. Îsal wê ev yek dîsa rojev be. 
- Êrîş û ambargoyên li ser taxên kurdan ên li Helebê Şêxmeqsûd û Eşrefiyeyê didomin. Kurd jî ber xwe didin. Ev mijar ji rojevê nakeve.
- Meseleya Efrîn, Serêkaniyê dîsa wê daxwaza sereke ya kurdan be.

NOTÊN JI BO BAŞÛR
- Li Başûr ev 15 meh in li Herêma Kurdistana Federe hilbijartin çêbûye lê hikumet nehatiye avakirin. Di hilbijartinê de PDK ku bûbû yekem û YNK ku bûye duyem li hev nakin. Mehên pêşî yên salê li ser vê yekê dê dîsa civîn çêbin. 
- Li Iraqê roja 15'ê sermaweza 2025'an hilbijartin li dar ketibû. Di hilbijartinê de PDK'ê serketineke baş bi dest xistibû. Encamên vê li Parlemenê dê hebin. Ev yek ji wê rojeva kurdan be.
- Piştî hilbijartinan li Iraqê postê serokomarî jî tê nûkirin. Postê Serokomarî di destê kurdan de ye. Ji sala 2005'an ve berendamê YNK'ê dibû serokomar, cara çûyî PDK'ê xwest berendamê wan bibe, lê bi ser neket. PDK û YNK wê di vî warî de jî bêne hemberî hev. Kesek wê bê hilbijartin.

NOTÊN JI BO BAKUR
- Li Bakur Komîsyona Îmralî ya DEM Partî xebatên xwe wê bidomîne. Li Meclisa Tirkiyeyê ji bo vê Komîsyonek hatibû avakirin. Komîsyonê dawiya salê du meh dema xwe dirêj kiribû, di vê du mehê de wê rapora xwe binivîse. DEM Partî jî di nav de ye. Ev yek bandorê dê li kurdan bike.
MESELEYA KAYÛMAN
- Wezareta Karên Hundir a Tirkiyeyê kayûm şandibû ser Şaredariyên DEM Partî yên Wan, Mêrdîn û hin navçeyên din. Ev mesele dê bê rojevê. Ji bo Mêrdînê wezaretê 4'ê mehê biryar da ku 2 mehên din kayûmê li ser Mêrdînê karê xwe bidomîne.
- Hin saziyan ji bo azadiya fîzîkî ya Ocalan wê 4'ê mehe li Amedê mîtîng li dar bixista lê ji ber rewşa hewayê hat betalkirin. Biryar dabûn ku demên pêş de li dar bixin.
MELESEYA DEMÎRTAŞ
- Ligel ku Dadgeha Mafên Mirovan a Ewropayê der barê siyasetmedar Selahattin Demirtaş de biryara îhlalê dabû û banga berdana Demirtaş hatibû kirin jî ew nehatibû berdan. îsal ev mijar wê dîsa were rojevê. Ligel vê meseleya berdana bi deh hezaran girtiyên kurd jî wê rojev be.
PERWERDEHIYA KURDÎ
- Saziyên kurdan ji Komîsyona Meclisê dixwazin kurdî bibe zimanê perwerdehî û di zagona bingehîn de cih bigire. Ev mijar wê dîsa rojeva kurdan be.
ÇAND Û HUNER
Ji tevgerê wisa dixuye ku saziyên kurdan di warê çand û hunerê de ji salên borî zêdetir wê xebatên xwe bidomînin. 

NOTÊN JI BO ROJHILAT
- Li Rojhilat ev hefteyek e li bajarên kurdan çalakiyên sivîl ên dijî rejimê didomin. Bi taybetî li Îlam û Kirmaşanê çalakî didomin. Sala nû de jî wisa dixuye dê bidomin. Îran rojeva Rojhilata Navîn û dinyayê ye. Ev yek bandorê wê li kurdan jî bike.

**

Nivîsa eleqedar:
- 10 hezar girtî bên berdan Tevgera Kurd wê bikaribe çi bike bo wan?