COLEMÊRG (DÎHA)

Ji bo ji nû ve avakirina navçeya Geverê ku xebatên înşayê bê navber didomin kampanyayek mezin a avakirinê hat destpêkirin. Parlementera HDP’ê ya Colemêrgê Selma Irmak ragihand ku ew ê di destpêkê de 160 piştre 600 malan restore bikin û banga alîkariyê kir.

Li navçeya Geverê ya Colemêrgê ku nêzîkê 10 hezar mal ji aliyê hêzên dewletê ve hatin şewitandin û ligel vê welatî careke din vegeriyan ser axa xwe xebatên avakirinê bê navber didomin. Bi taybetî li taxên Orman, Cumhuriyet, Dizê, Kişla û Gungorê heya niha sedan malên kêm xisar dîtine ji aliyê welatiyan ve ji nû ve hatin dirustkirin. Gelek malbatan jî ligel biryara hilweşînê ya lijneya girêdayî Wezareta Hawirdor û Bajaran jî malên xwe ava kirin. Ji bo avakirina malan bi piştgiriya Şaredariya Geverê, Komaleya Piştgirî û alikariyê ya Rojava û Yekîtiya Şaredariyan a Anatolayaya Rojhilata Başûr (GABB) kampanya hat despêkirin. Di çarçoveya kampanyayê de dê amûrên înşaatê ji bo malbatên malên wan kêm xisar dîtine bên dayîn û piştre ji bo malbatên malên wan qet nemane malên karkas (İsteket) bên înşakirin. 

Ji zêdetirî 3 hezar mal dê bên înşakirin

Parlementera Partiya Demokratîk a Gelan (HDP) ya Colemêrgê Selma Irmak derbarê mijarê de axivî û behsa kampayanyayê kir. Irmak anî ziman ku piştî qedexe hat rakirin kêm zêde pêdiviyên mirovî hatin pêşwazîkirin û pergala vê xebata wan rûniştiye. Irmak da zanîn ku ji ber zivistana zû ya tê navçeyê divê ew demildest pirsgirêka cihê mayînê yên malbatan pêşwazî bikin û ji bo vê jî komîsyonên xwe ava kirine. Irmak destnîşan kir ku wan bi riya komîsyonên ji navendê xebat didin meşandin tespîta piraniya malan kirine û wiha axivî: "Heya niha li gorî xebatên hatine meşandin ji zêdetirî 3 hezar malan kêm xisar dîtine û em dikarin van înşa bikin. Gelek malên karkar hatin tespîtkirin. Em ê ji malbatên dest bi xebatan kirine re hewcehiyan bidin. Ji kesên derfetên wan tune bin re jî hemû amûr bên dayîn û kesên dildar jî dê piştgiriya wan bikin.’ 

‘Em ê malên welatiyan înşa bikin’

Irmak got ku ew ê di serî de ji 160 malan piştre jî tedîlata 600 malan çekin û ev agahî dan: "Kampanyaya madî, melzemeyên înşaatê û dildarên di van înşayê de bixebitin hat destpêkirin. Di nav vê hefteyê de amûrên înşaatê tên û li gorî tespîtan bi rêzê dê tadîlata mala bê çêkirin." Irmak diyar kir ku wan 3 meh hedef danîne pêşiya xwe û rojek divê winda nekin û wiha berdewam kir: "Ji bo xebatên mezin jî piştgiriya karsazan heye. Divê karsazên me çi ji destên wan tê ji bo piştgiriya civakî bikin. Nexwe demek direj li pêşiya me nîn e. Pêvajoyeke ku piştgiriya gel biçe serî li pêşiya me ye."

‘Herkes bila li sekna Geveriyan xwedî derkeve’

Irmak diyar kir ku welatiyên Geverê ligel hemû polîtîkayên koçdariya bi darê zorê li ber xwe dane û ji bo ku ev sekn vala dernekeve piştgiriyek mezin divê. Irmak bi lêv kir ku piştgiriya bi Geverê re di heman demê de li cem berxwedanê cih girtin e û wiha dom kir: ‘Berovajî vê çêbe heke ev sekn nikare li hember şertên mehên zivistanê bisekine. Kesên nekarîn paceyek û deriyek peyda bikin dê neçarî koç bikin. Ev koçberî jî mixabin ne bi deste dewletê dê ji destê me pêk were. Gel li ber xwe da û niha dora me ye."