Li Sêwrega Rihayê 30 hezar û 231 kesî bi hev re helbesta Ahmet Arîf "Anadoluyum Ben (Ez Anadolî me)" xwend û bi vê yekê rekor şikand. Sêwregê rekora Meletî şikand û ket Pirtûka Rekoran Guinnessê.

Berê li Meletî 23 hezar û 822 kesî bi hev re pirtûk xwendibû û ketibûn Pirtûka Rekoran Guinnessê. Niha li Sêwregê "Komeleya Pêşketin û Xebata ji bo Bajarîbûna Sêwregê" projeya "Haydê em rekorek dinyayê bişkînin" da dest pê kirin. Yek ji armancên komeleyê jî ew e ku Sêwregê bike bajar Ev xebat jî yek ji wan xebatan e ku balê bikişîne ser Sêwregê. Ji bo vê ceribandina şikandina rekora xwendina pirtûkan li dar xist (25.09.2012). Di bin çavdêriya Nûnera Guinnesê ya Tirkiyeyê Şeyda Subaşi Gemici de li Stada Furkan Tuysuz a Sêwrekê dest bi xwendina pirtûkê kirin. Gemici wisa got ku 30 hezar û 231 kesî bi hev re helbest xwend û rekorek nû şikandin; ez hemû sêwregiyan pîroz dikim.

Di nav ew qas kesî de jin û zarok jî hebûn. Pêşî fotokopiyên helbesta Ahmed Arîf "Anadoluyum Ben" li gel belav kirin. Dûre ji bo xwendinê ceribandin kirin û herî dawî jî bi deh hezaran kesî 3 caran helbesta Arîf bi yek dengî xwendin.

Di nav mêvanan de Mebûsê CHP'ê Sezgin Tanrikulu û Nurettin Demir, Şaredarê Sêwregê Ali Murat Bucak jî hebûn. Piştî çalakiyê amadekaran belge dan beşdaran. Ev çalikiya ku ji bo Sêwregê wekî gavek girîng dihat binavkirin digel Şaredariya Sêwregê, Şaredariya Rihayê, Şaredariya Bajarê Mezin a Amedê jî piştgirî didanê.

Sêwreg navçeyeke Rihayê ye û serjimariya wê 115 hezar û 891 e. Tevî gundên wê jî serjimariya wê digihîje 221 hezar û 875 kesî. Sêwreg li Tirkiyeyê duyemîn navçeya herî mezin e. Li Sêwregê eşîra Bucak'an serdest in û şaredariya navçeyê jî di destê wan de ye.

Diyarname - Ajans