Diyarname
Ji Qamişloyê du nûçeyên girîng hene, yek jê li ser elektrîkê, ya din li ser avê ye.

ELEKTRÎK WÊ 16 SAETAN HEBE
Meclîsa Bajar, Şaredariya Gel û Ofîsa Jeneratoran, roja 4`ê Hezîranê der barê zêdekirina saetên xebitandina jeneratorên elektrîkê de hin biyar girtibûn. Wan niha biryarnameyeke derxist.
Li gorî biryarnameyê, dê Rêveberiya Xweser mazota arzan bi buhayê 125 lîreyê bide xwediyê jeneratoran, da ku rojê 16 seatan elektrîkê bidin şêniyan. Li gorî wê jeneratorên ku rojê 16 seetan bixebitin wê her embêrek bi 24 hezaran be, her wiha yên 24 seatan dixebitin wê her ambêrek bi 100 hezar lîreyan be.
Hevserokê Komîteya Jeneratoran li Şaredariya Qamişlo Xalid Cuma ji bo ANHA'yê gotiye; "Biryara xebitandina jeneratoran bo 16 saetan li şûna 8 saetan, dê ji destpêka tîrmehê ve dest pê bike. "
Cuma her wiha behsa planeke berfireh a Şaredariya Qamişlo kir û got: "Li şûna jeneratorên biçûk ên li taxan, jenereatorên mezin li cihekî deynin. Li şûna 650 jeneratorên ku hatine bicîhkirin, dê li her aliyekî bajêr çar jeneratorên mezin hebin, ev yek dê ji bo jîngeha bajêr baş be û elektrîkê bi awayekî rêkûpêk bigihîje şêniyan. "
Her wiha Cuma diyar kir ku jeneratorên ku niha 8 saetan dixebitin dikarin 16 saetan jî bixebitin, lewma şaredarî li ser wan ferz nake ku jnereratorekî nû deynin. Cuma da zanîn ku ev biryar dê li hemû herêmên Bakur û Rojhilatê Sûriyeyê were pêkanîn.
Di salên dawî de artêşa Tirkiyeyê santralên elektrîkê jî di nav de, êrîşê hin binezaziya herêmê kiribû. Lewma hilbirîna elektrîkê li herêmê kêm bûbû. Rêveberiya Xweser bi vê biyarê dixwaze pirgirêkê çarser bike.

20 BÎRÊN AVÊ TÊNE KOLANDIN
Ji bo ji Qamişloyê re av zêde were dabînkirin, Şaredariya Gel a bajêr, bi daxuyaniyekê ku ji hêla endazyar Ebdulkerîm Mihemed ê nivîsgeha lêkolînan ve hate xwendin, destpêkirina projeya kolandina 20 bîran li nêzî stasyona avê ya Hilêliyê ragihand. Wê lêçûna vê projeyê nêzî 2 mîlyon û 850 hezar û 889 dolar be.
Mihemed diyar kir ku armanca projeyê ewlehiya avê ya herêmê were bipêşxistin û mîqdara avê tê ya ji bo stasyonên pompekirinê zêde bibe. Ev jî îstîqrareke xebata wê stasyonê, peydakirina pêdiviyên torê û zêdebûna mezaxtina şêniyan misoger dike.
Mihemed aşkera kir ku li gorî planê, wê 12 bîr li hawiza stasyona Hilêliyê, 2 bîr li stasyona Ceqceq û 6 bîr li beşa rojhilatê bajêr, bi kûrahiya di navbera 325 û 425 metreyî de werin kolandin. Ev yek wê li gorî lêkolînên jeolojîk ji bo pêkanîna hilberîna bilind a her bîrekê ji avê, pêk bê.
Têkildarî ka wê proje pirsgirêka avê ya li Qamişloyê bi dawî bike yan na Mihemed got: "Pêşbîn e hilberîna avê bi rêjeya 75 metrekup di her saetekê de ji bo her bîrekê, be. Anku ji bo 20 bîran wê di saetê de hezar û 500 metrekup avê were derxistin û wê ev av bigihîne stasyonên pompekirinê ku avê li taxên giştî belav bikin."
Tê texmînkirin ku di 270 rojan de ev proje temam bibe.