Diyarname
Serokê TFF'ê (Federasyona Fûtbolê ya Tirkiyeyê) İbrahim Haciosmanoglu ragihand ku dê hakêmekî biyanî maça Galatasaray (GS) û Fenerbahçeyê (FB) bi rê ve bibe.

Li Tirkiyeyê di warê baweriya bi hev re her tişt ser û bino bûye, êdî kes bi kesî bawer nake. Di warê fûtbolê de jî ev yek derketiye lûtkeyê. Berê tîmên mezin ên Tirkiyeyê xwestibû hakêmên VAR'ê ji derveyê Tirkiyeyê bin, vê carê xwestibûn hakêmê nava sehayê jî yekî biyanî be.

Li ser vê yekê Serokê TFF'ê ragihand ku dê maça derbî ya di navbera Galatasaray û Fenerbahçeyê de hakêmek biyanî hebe. 

Haciosmanoglu îro li Rivaya Stenbolê daxuyanî da çapemeniyê û got dê hakêmeke ji derveyî Tirkiyeyê maçê bi rê ve bibe. Haciosmanoglu negot dê ev hakêm kî be û ji kîjan welatî be, lê got dê Lijneya Hakêman vê yekê eşkere bike.

Bi vê yekê re di dîroka fûtbola Tirkiyeyê de yekem car hakêmek ji derveyî Tirkiyeyê tê maçeke Lîga Super bi rê ve dibe.

Maça GS-FB'yê roja 24'ê mehê tê lîstin. Di dawiya hefteya 23'Yan de GS bi 63 pûanan yekemîn, Fenerbahçe bi 57 pûanan di rêza duyemîn de ye. Ji bo şampiyoniyê ev maç gelek girîng e.