Diyarname
Enstîtuya Kurdî ya Stenbolê ji bo 15'ê Gulanê Roja Zimanê Kurdî çalakiyek li dar xist. Di çalakiya ku li Odeya Tabîbên Stenbolê li dar ket û rastî eleqeyek mezin rast Hevserokê Enstîtuya Kurdî ya Stenbolê Samî Tan axivî. Tan bal kişand ser girtina Enstîtuyê ya ji aliyê hikumtê ve û got ku ligel vê yekê jî ew qas kes li vir hatine ev yek cihê kêfxweşiyê ye. 
Tan roja ziman pîroz kir, got ku li Rojhilata Navîn êdî bêyî kurdan tu pêşketin çênabe, tuştê ku kurd bikin êdî divê yekîtiya xwe xurt bikin.
Tan ji rewşenbîran xwest ku zor li partî û rêxistinan bikin ku ew ji berjewendiyên xwe yên partîtî, malbatî û şexsî dûr bikevin û ji bo berjewendiyên neteweyî bixebitin. Tan got ku vê carê kurd bi ser nekevin dê sed salek din winda bikin.
Piştî axaftinê bawernameyên mamosteyên ku li Enstîtuyê ders girtin û gihîştin asta mamostetî hatin dayîn. Dûre jî belgefîlmê derhêner Keremo yê bi navê "Şûr û qelem" ku li ser avakirina Enstîtuya Kurdî ya Stenbolê hatiye kişandin hat nîşandayîn.

HDP'ê jî Roja Ziman pîroz kir
Her wiha HDP'ê jî bi peyameke nivîsî Roja Zimanê Kurdî pîroz kir. Di peyama ku bi kurdî hat belavkirin de wisa hat gotin: "Em di roja Cejna Zimanê Kurdî de careke din daxwaza perwerdeya zimanê dayikê dikin. Ji bo ku perwerdeya zimanê dayikê were dayîn, em dubare daxwaz dikin ku xala 42emîn a Makeqanûnê were guhertin. Di wan peymanên navneteweyî yên ku Tirkiyeyê jî îmze kiriye de, mafê perwerdeya zimanê dayikê hatiye misogerkirin. Em careke din vê rastiyê eşkere dikin."
HDPi roja ziman pîroz kir û got: "Em, di roja Cejna Zimanê Kurdî de, hemû kedkar û xemxwerên zimanê kurdî yên ku gelê kurd û zimanê kurdî ji komkujî, asîmîlasyon, red û înkarê parastine, bi rêzdarî silav dikin, Cejna Zimanê Kurdî pîroz dikin."