Diyarname
Ji bo zarok kurdî hîn bibin, ji bo baştir û dirustir hîn bibin pirtûkek nû hat çapkirin, "Zimanê Me"
"Zimanê Me" ji aliyê Haydar Diljen û Sabîha Diljen ve hatiye amadekirin û niha ji Weşanên Aryenê derket. Pirtûka niha li ber dest ji bo asta destpêkê ye. Wêneyên di pirtûkê de ji aliyê Bilal Karagoz ve hatine xêzkirin.
Pirtûka "Zimanê Me" rengîn, bi çapek xweşik li ber destan e. Çapa vê pirtûkê ya yekem di sala 2008'an de bi alîkariya Daîreya Perwerdehiyê ya Swêdê ji aliyê Weşanxaneya Diljen ve li Swêdê hatibû çapkirin, lê niha xwe gihand ber destên zarokên li Bakur jî. Di çapa nû de bi xêzên Karagoz pirtûk rengîntir bûye.
Bi vê pirtûkê zarok, her wiha yên bixwazin ji sifirê hînê kurdî bibin jî dê fêde bigirin. Pirtûk ji bo zarokên 5-8 salî hatiye amadekirin. Bi alfabeyê dest pê dike, dûre hînê bilêvkirin, axaftin û xweşik nivîsandinê dibin. 
Amarekarên pirtûkê wisa gotine, "Naveroka vê pirtûkê neynika jiyana demokratîk e. Di vê pirtûkê de zarok gelek azad in. Ew dipirsin, diaxivin û tiştan dikin. Nivîsarên vê pirtûkê bi yeksaniya jin û mêran hatine hûnandin. Ji bo ku hewesa xwendina kurdî li ba zarokan bilind bibe me cih da çend zûgotinok, stran û helbestên kurdî jî. Nimûneyên çanda kurdî yên wekî niştonek, gotinên pêşiyan û çîrok jî vê pirtûkê rengîntir dikin."
Amadekaran di dawiya pirtûkê de ferhengoneke hemmane jî bi kurdî amade kirine.

- Zimanê Me / Amadekar Haydar Diljen û Sabîha Diljen / Weşanên Aryen / Ziman / 2024 / 110 rûpel

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.