MÊRDÎN 
Serokên baroyên bajarên bakurê Kurdistanê çûn Mêrdînê û bertek nîşanî tayînkirina qayûman dan. Serokên baroyan gotin ku qayûm ne rewa ne û xwestin ew bi paş ve bên kişandin. 
Çalakiyên li Mêrdînê yên li dijî tayînkirina qayûm berdewam in. Baroyên Êlih, Mûş, Riha, Amed, Şirnex, Sêrt, Wan, Colemêrg, Agirî, Semsûr û Bedlîsê û endamên lijneya rêveber hatin Mêrdînê. Şandeyê bi Baroya Mêrdînê re hevdîtin kir û piştre bi beşdariya gelek rêxistinên hiqûqê û parêzeran li pêşiya Edliyeya Mêrdînê daxuyanî dan. 
BANG LI SIYASETMEDARAN KIRIN 
Serokê Baroya Mêrdînê Ahmet Duyan pêşî axivî û got ku qayûm, derhiqûqî, derqanûnî ye û binpêkirina mafê bijartin û hilbijartinê ye. Duyan, got ku divê aştiyeke mayinde bê kirin û bang li siyasetmedaran kir. Duyan, xwest ku qanûna rê li ber tayînkirina qayûman vedike were betalkirin. 
‘NE REWA YE’
Berdevkê baroyên bakurê Kurdistanê û Serokê Baroya Mûşê Kadîr Karaçelîk jî got ku ew ji bo piştgiriyê hatine Mêrdînê. Karaçelîk diyar kir ku gel di 31’ê Adarê de tercîha xwe kiriye û bi tayînkirina qayûman re li rojeke reş hişyar bûne. Karaçelîk, wisa got, "KHK’a OHAL’ê ya wekî hinceta tayînkirina qayûman tê nîşandan, li dijî demokrasiya herêmî ye. Qayûm li dijî demokrasiya Zagona Bingehîn e û mudaxileyeke giran a li dijî mafê bijartin û hilbijartinê ye. Tu rewatiya qanûnî û civakî ya vê yeke nîn e. Divê desthilatdarî gavek zûtir qayûman bi paş ve vekişîne û qanûna rê li ber tayînkirina qeyûman vedike betal bike."
Karaçelîk, îşkence, zardor û qedexeyên li dijî çalakvanan jî şermezar kir. 
Şande, piştî daxuyaniyê bi Hevşaredarên Bajarê Mezin a Mêrdînê Ahmet Turk û Devrîm Demîr re hevdîtin kir. 
MA