Amed
Şaredarê Bajarê Mezin ê Amedê Osman Baydemîr di dema xwarina fitarê ya ku ji bo rojnamegeran da de axivî û got ku divê hikumeta Tirk bi tunehesibandina 20 mîlyon kurdî siyaseta derve û hundir neke û wiha dom kir: “Dagikirina Suriyeyê, Kurdistana Suriyeyê dê bibe dînitî. Her wiha dê Rojhilata Navîn ji aştiyê dûr bixe. Tu kurdek dê destûrê nede ku hikumet Qamişlo û Efrînê dagir bike. Em wekî ewladê kurdan dê emê ji bo vê nebêjin ‘serçavan’.”

Baydemîr li Civata Rojnamegerên Başûrêrojhilat xwarina firatê da rojnamegeran. Serokê Civata Rojnamegeran Veysî Îpek, endamên lijneyê, Serokê Cemiyeta Rojnamegerên Amedê Huseyîn Kaçar, nûnerên ajans, televîzyon, radyo û malperên înternetê û nivîskar bi giştî li dor 150 rojnamegerî tevli xwarinê bûn. Her wiha Hevseroka BDP’a Amedê Zubeyde Zumrut û serokên navçeyan jî tevlî bûn.

Baydemîr spasiya xwe ji bo rojnamegeran kir û wiha got: “Rojnamegerên vê herêmê di nav şert û mercên zehmet de dixebitin. Li vir rojnamegerî wekî kirasê ji agir e. Bila Xwedê me hemû ji agir bistirîne.”

Şaredar Baydemîr bang li çapemeniya herêmî kir û wiha got: “Hûn wijdana vî bajarî ne. Ger ne li vî bajarî ba we dê rojnamegerî nekira. Ger hûn me rexne nekin em pêş nakevin. Çapemenya herêmî ji bo me girîng e. Bajarê ku çapemeniya wê tune be, herêma ku çapemeniya wê ne azad be û welatê ku çapameniya wê ne azad be îradeya azadî jî tune. Welatê ku îradeya wan azad tune be ne mimkûn e mirov behsa wijdana azad jî bike. Ger li welatekî wijdan tune be ez ji wir bi guman im. Ji ber ku wijdan bingeha îmanê ye. Destpêka îmanê ye.

HEWLDANA JI AŞTIYÊ BERPIRSYARÎ YE

Baydemîr da zanîn ku ew bûye mêvanê dayikek ku zarokê xwe winda kiriye û wiha got: “Wê dayikê mehek berê zarokê xwe winda kiriye. Ligel vê êşê sekneke bi rûmet nîşan da. Min şikir kir. Ligel êşa xwe ya mezin, got ‘min ewladê xwe winda kir, ez aştiyeke mayînde ji bo gelê xwe dixwazim, bila zarokên din nemirin.’ Belê dayikek wisa bû, ez destê wê radimûsim. Em wekî civak jî deyndarê wê ne. Ji ber vê jî ji bo aştî û edeletê hewldan berpirsyariya me ye."

20 MÎLYON KURDÎ TUNE DIHESIBÎNE

Şaredare Bajarê Mezin ê Amedê Baydemîr wiha dom kir: “Gelo ev dînitî çi ye? Ger ku mirov hezm nekin ku cîranên mirovan kurd in, dema ku cîranên mirovan kurd bin û jiyan li mirovan heram be, wê demê mirov çawa li welatê xwe bi 20 mîlyon kurdî re dikarin bijî. Ez aşkere dibêjim. Kesên vî welatî bi rê ve dibin 20 mîlyon kurdî tune dihesibînin. Bi tunehesibandinê siyasetê dikin. “

DAGIRKIRINA KURDISTANA SURIYEYÊ DÊ BIBE DÎNITÎ

Baydemîr li ser meseleya rojavayê Kurdistanê jî sekinî û wiha got: “Dagirkirina Suriyeyê, Kurdistana Suriyeyê dê bibe dînitî. Her wiha dê aştî jî ji Rojhilata Navîn dûr bike. Riya esas Iraq e. Li Îranê jî dê Kurdistana xweser be. Li Tikriyeyê Kurdistana xweser be. Dê li Suriyeyê jî Kurdistana xweser be. Riyeke din ya vê tune. 20 mîlyon kurd êdî hebûna xwe ji bo gelekî ku wan red dike dê diyarî neke. Bila hemû cîhan vê wisa bizanibe. Bila gelê tirk jî bê bizanibe. Gelê ku hebûna me qebûl neke em hebûna xwe ji bo wan diyarî nakin.”

DAGIRKERÎ NAYÊ QEBÛLKIRIN

Baydemîr di dawiya axaftina xwe de wiha got: “Gelê kurd tu carî dê destûrê nede dagirkirina Qamişlo û Efrînê. Ez wekî ewladekî kurd vê yekê qebûl nakim. Nabêjim serçavan, kerem bikin. Bê guman çekê min tune. Lê destê min hene. Dilê me heye. Em bi ziman, dil û polîtîkaya xwe dê li dijî vê derkevin."

Baydemîr wiha got: “Di dilê min de bajarê sereke yê Kurdistana xweser Qamişlo ye. Bajarê sereke yê Kurdistana Xweser Amed e, Hewlêr e û Mahabad e an jî dê ew biryarê bidin. Divê sînor bên rakirin û derbasî yekîtiya Gumrukê bê kirin. Divê hevkariya siyasî û îdarî bê kirin."