Diyarname
Ji bo salvegera rojnamegeriya kurdî gotûbêjek bi navê "Di serdema modern de rojnamegeriya kurdî" li dar ket. Rojnameger Cemil Oguz li vir got, "Ji bo çapemeniya kurdî hestê neteweyî lazim e."
Roja 22'yê avrêlê 126'emîn salvegera derxistina rojnameya "Kurdistan" e ku Mîqdad Mîdheq Bedirxan ew derxistibû. Kurd vê rojê wekî Roja Rojnamegeriya Kurdî pîroz dikin. Ji bo vê, roja 20'ê mehê li Weqfa Îsmaîl Beşîkçî gotûbêjek hat lidarxistin.
Di gotûbêja ku wekî moderator Nûjîn Onen Tacar bi rê ve bir de ji Rûdawê rojnameger Rawîn Stêrk û edîtorê Diyarnameyê rojnameger Cemil Oguz wekî axifger beşdar bûn.
Xwediyê Weşanên Nûbiharê Suleyman Çevîk, xwediyê Weşanên Avestayê Abdullah Keskîn, rojnameger Azad Altun, Mewlût Oguz, Îhsan Kaçar, nivîskar Mem Med, Nihat Gultekîn, Îsmaîl Beşîkçî, Sekrokê Weqfa Beşîkçî Îbrahîm Gurbuz jî di nav de gelek kes wekî guhdar lê amade bûn.
Pêşî rojnameger Rawîn Stêrk axivî, qala li dinyayê derketina rojnameyan, 4 qonaxên rojnamegerî kir. Stêrk gotin anî ser rojnamegeriya kurdan û got, "Êdî cihan hay ji rojnamegeriya kurdî heye. Em di asta dinyayê de rojnamegerî dikin. Ji bo çapemeniya dinyayê em êdî bûne çavkanî jî. Halê medyaya kurdî baş e."
Stêrk qala zor û zehmetiyên ku li qadê dijîn jî kir û dûre çapemeniya bakur û başûr da ber hev. Stêrk got ku li Bakur rojnamegerî di warê edîtorî de ji Başûr pêşketîtir e.
Rojnameger Cemil Oguz pêşî pirsa "Dema em dibêjin serdema modern em çi jê fêm dikin?" kir û got, "Gelo em di vê serdemê de naxwazin rojnameyên çapkirî yên bi kurdî hebin? Niha rojnameyeke rojane ya bi kurdî ya kurdan tune ye, lê li dinyayê ya her kesî heye, çima ya me tune ye? Ma di serdema modern de xelkê dest ji çapkirina rojnameyan berdaye, em berdin?"
Oguz dûre qala rojnameya heftane ya bi kurdî Xwebûnê kir û gotin bir ser kovarên bi kurdî ku par û pêrar derketine; îstatîstîkên wan yek bi yek pêşkêş kir. Oguz bibîr xist ku li Amedê 9 rojnameyên rojane yên kurdan çap dibin hene, li ser wan sekinî, qala dîroka wan kir lê diyar kir ku ji wan yek jî bi kurdî nîn e, hemû bi tirkî ne û pirsa "Çima?"ya wê kir.
Rojnameger Oguz diyar kir ku di vê serdemê de divê mirov tora civakî baş bikar bîne, şaşiyên ku têne kirin bi mînakan anî ziman û got, "Dema hûn tiştek RT dikin, yan diecibînin pêşî bifikirin, gelo dibe ev agahî şaş be?"
Oguz piştî bi mînakan gelek rexneyên ku li saziyên çapemeniyê yên kurdan kir, got, "Piştî van rexne û gotinan, ez bi sê xalan bidim ser hev: Yek, ji bo çapemeniya kurdî hesta neteweyî lazim e, di vî warî de pirsgirêk hene. Didu, em tora civakî li gor rêgezan bikar bînin ne ji bo xapandinê, ya sisêyan jî, çi dibe bila bibe dema em tiştek bikin divê ji yên berî xwe baştir bikin, yan na ne hewce ye em bikin."
Foto: Mewlût Oguz