Diyarname
Ji Amed heta Batman, Meletî, Enqere, Riha, Şirnex, Wan û gelek bajarên din gel ji bo pîrozbahiya 1'ê Gulanê li qadan bûn. Vaye bajar bi bajar 1 Gulan:

AMED

1'ê Gulanê li Qada Îstasyonê ya Amedê ji aliyê 10 hezaran kesan ve hate pîroz kirin. Di mîtînga karkeran de operasyonên siyasî û leşkerî, tecrîda li Îmraliyê hate şermezarkirin. Di mîtîngê de Hevseroka KCD'ê Aysel Tugluk got ku ew dixwazin pirsgirêkê bi înkar û îmhaya kurdan çareser bikin û wiha dom kir: "Kesên li ser înkar û îmhaya kurdan li çaseriyê digerin û kedxwariya karkeran dikin heman kes in. Divê hemû welatiyên ku mafê wan tê binpêkirin têkoşînek hevpar bimeşînin."

Serokê Komîteya Mîtîngê û Nûnerê Turk-Îşê Bahri Zulkuf Karakoç, axaftina destpêkê kir û xwest berî her tiştî operasyonên siyasî û leşkerî bi dawî bibin. Sekreterê Rêxistinkirinê yê Giştî yê Genel Îş'a DÎSK'ê Remsî Çalışkan jî têkoşîna Mazlum Dogan, Vedat Aydin, Musa Anter û Mehmet Sincar silav kir.

Serokê TES-Îş'ê Alî Oncu jî bal kişand ser kedxwardiya li Tirkiyeyê û wiha got: "Ji bo çareseriya pirsgirêka kurd divê siyasetmedarên kurd ên di operasyona KCK'ê de serbet bên berdan. Divê operasyonên siyasî û leşkerî bi dawî bibin. Divê tecrîda li Îmralî bi dawî bibe. 280 rojin li Îmraliyê tecrîd didome. Divê bi lezgîn dawî li vê tecrîdê bê. Ger ku aştî dê xwestin divê bi Qandîl û Îmraliyê re hevdîtin bê kirin."

ENQERE

Li Enqereyê ji ber sendîkayan li hev nekir, li du cihan pîrozbahî hat kirin. Yek jê li Sihhiyeyê ku zêdetir sendîka, partiyên siyasî yên muxalîf lê bû, li Tandoganê jî sendîkayên nêzî hikumetê û wezîrên hikumeta Ak Partî beşdar bûn.
Li Qada Sihhiyeya Enqereyê ji her gel û her pîşeyan bi hezaran kedkar bi daxwaza 'Ked, azadî, dad û aştî' hatin cem hev. Di pîrozbahiyê de peyamên cur bi cur hate dayîn.
Bi deh hezaran kedkar bi pêşengiya KESK, DÎSK, TMMOB, TTB li ber Îstasyona Trênê ya Enqereyê li hev kom bûn û heta Qada Sihhiyeyê meşiyan. Di pîrozbahiyan de kurd, tirk, laz, ermenî, suryanî, ereb kedkar, karker, hunermend, şanoger, alewî, jin, travestî, astengdar, femînst û hwd. hatin cem hev û 1Gulan Cejna Karkeran pîroz kir. Her wiha di pîrozbahiyê de gelek partiyên siyasî û rêxistinên civakî yên wekî ÎHD, ESP, BDP, SDP, EMEP, CHP, HAK-PAR, ODP, Partiya Yeşîller beşdar bû û daxwazên xwe anîn ziman. Di meşê de di korteja BDP'ê de ji bo bal bikişînin zextên li ser çapemeniya kurd rojnameyên Azadiya Welat û Ozgur Gundem hatin hilgirtin û dirûşmên "Bijî Yek Gulan", "Bijî Serok Apo", "Bê Serok jiyan nabe", "Ocalan, Ocalan" hate avêtin. BDP'yiyan nasnameyên xwe hilgirtin jor û dirûşmeya "Em naxwazin bê nasname bijîn" berz kirin.
Cîgirê Serokê Koma BDP'ê Hasîp Kaplan, Alîkari Serokê Giştî ya CHP'ê Gursel Tekîn û parlementerê CHP'ê jî tev li pîrozbahiyê bûn.

Sendîkayên Turk-Îş, Memur-Sen û Hak-Îş jî li Qada Tandoganê Cejna 1 Gulanê pîroz kir. Wezîrê Ewlehiya Civakî û Xebatê yê Ak Partî Farûk Çelîk û alîkarê wî Halît Etyemez beşdarî pîrozbahiya ji aliyê sendîkayên ku nêzî hikumetê ne bû û xîtabî girseyê kir. Çelîk, di axaftina xwe de pesnê hikumeta xwe da.

WAN

Li Wanê, bi pêşengiya BDP, KESK, DÎSK, Sendîkaya Kar a Şaredariyê û TMMOB'ê mîtîng hate lidarxistin. Karker berî mitîngê li ber Mavî Plazayê hatin cem hev dest bi meşê kirin. Di meşê de pankratên "Daxwaza gelê me daxwaza me ye", "Kar, nan, azadî", "Êdî pergala taşeronan sendîka mafê me ye jî" vekirin û dowîzên "Ji bo jiyaneke bi rûmet ji taşaronê re na" û "Di heman demê de aştî" hatin vekirin. Karkerên li qadê kombûn bi stranên kurd govende girtin. Piştî rêzgirtinê Berdevkê Platforma Şaxên KESK'ê Mehmet Aydemîr axivî û cejna hemû karkeran pîroz kir. Aydemîr, diyar kir ku ew li hemberî tecrîd û komkujiya jinan li qadan in.

ÊLIH

Li Êlihê bi 10 hezaran kesên 1'ê Gulanê pîroz kirin berî biçin qada mîtîngê li ser kolana Diyarbakır û Mîllî Egemenlîkê meş pêk anîn.
Sendîsayên girêdayî KESK û DİSK'ê li ber Otela Zekî kom bûn û heta Mîllî Egemenlîk meşiyan. Girseya ku kortejên dirêj çêkir, heta Qada Cumhuriyetê meşiyan. Girsê di meşe de pankartên "Kujerên karker û kedkar kuştin li ku ne?" "Ji bo biratiya gelan û yekîtiya karkeran Bijî 1'ê Gulan" vekirin. Disa di meşê de pankarta ku nav û wêneyên endamên KESK'ê yên di operasyona KCKê de hatin girtin hate vekirin. Girse dowîzên bi kurdî û tirkî li ser "Bijî Yek gulan" hatibû nivîsandin rakirin û heta Qada Komarê meşiyan.

Li aliyê din endam û rêveberên BDP'ê jî li ber avahiya BDP'ê ya Êlihê kom bûn û di kolana Diyarbakirê re meşiyan. Girsa BDP'ê di meşê de pankartên "Ji tecrîda Îmralî re na" û "Em dayik in, alîgirê aştiya bi rûmet in" vekirin. Girsê bê navber diruşmên "Bijî yekîtiya gelan" û "Bijî yek gulan" berz kirin. Di meşê de parlementerê BDP'ê Sirri Sureyya Onder, Endama Lijneya Kordînasyona KCD'ê Ayla Akat Ata, Endamê Meclisa BDP'ê Osman Ergin, Rêveberê Giştî yê Petrol-Îşê Nimettulah Sozen ji amade bûn. Ji ber ku Hevserokê KCD'ê Ahmet Turk negihîşt mîtîngê peyama wî hate xwendin. Nêzî 15 hezar kesên li Qada Komarê kom bûn bi girseyî govend gerandin.
 

SEMSÛR

Li Semsûrê endam û rêveberên KESK, DİSK û BDP'ê li Parka Mîmar Sinanê kom bûn û heta Parka Mustafa Yucelê meşiyan. Girsê di meşê de bi dirûşme û pankartên xwe daxwazên xwe anîn ziman. Li parkê BDP'ê stanta îmzeyan a 4 daxwazên kurdan vekir.
 

MELETÎ

Li Meletiyê di bin pêşengiya DİSK, KESK û saziyên sivîl ên civaki bi tevlêbûna 4 hezar kesan li qada Emeksizê pêk hat.

RİHA

Li Rihayê ji ber ku walî destûr neda pîrozbahiyên 1'ê Gulanê endamên ÎHD, Platforma Şaxên KESK'ê, HDK, Hak-Par, BDP, EMEP, DÎSK, Komaleya Çanda Alewiyan, KAŞİP, Karkerên Îş-Kur, HODER û gelek kesên din li Qada Topçuyê hatin cem hev û daxuyanî dan çapemeniyê û biryara walî şermezar kir.
 Di daxuyaniya ku dibişiya mitîngê de jinên kurd bi kincên neteweyî beşdar bûn. Li ser navê Platforma Şaxên KESK'ê yên Rihayê xîtabî girseya nêzî 2 hezar kesî kir û da zanîn ku AKP'ê pêkanînên 12 Rezberê pêk tîne.

ŞIRNEX

Li Şirnexê jî Cejna karkeran bi coşekî mezin hate pîroz kirin. Berî pîrozbahiya ku ji aliyê KESK û DÎSK bi mîtîngekî li Qada Cûmhuriyetê hate lidarxistin de, bi hezaran kes li ber avahiya şaredariyê kom bûn û heta qada pîrozbahiyê meşiyan. Di meşê de diruşmên dijberî AKP'ê hatin avêtin. Di pîrozbahiya ku bi rêzgirtina ji bo bîranîna kesên di têkoşînê de jiyana xwe ji dest dane dest pê kir, de peyamên girîng hatin dayîn. Di axaftinan de hate xwestin ku bila komkujiya Roboskî were ronîkirin, bila operasyonên leşkerî û siyasî were sekinandin, astengiyên li hemberî azadiya rêxistinbûnê were rakirin û bila tecrîta li ser Rêberê PKK'ê Abdullah Ocalan were rakirin.

MANÎSA

Li Manîsayê jî saziyên sivîl, sendîka û partiyên siyasî bi hev re 1 Gulan pîroz kirin. BDP'a Manîsayê jî bi pankartên xwe yên bi kurdî û tirkî li qadê bû.

***

Nûçeya eleqedar:

- Li Taksîmê cih nema!