Diyarname
Pirtûkeke nû ya helbestan “Asoya Peyvên Sermest” ku helbestvan, wênesaz M. Zahîr Kayan nivîsiye derket. Pirtûka ku ji Weşanxaneya Nûbiharê derket di helbestê de şêwazek cihêreng e.
Pirtûkeke M. Zahir Kayan bi navê “Hîç” îsal ji Nûbiharê derketibû û ev pirtûka niha derketiye dikare wekî dewama wê jî bê hesibandin. Kayan di vê pirtûkê de jî şêwaza xwe ya cihêreng domandiye. Hem ji aliyê nivîsandinê, hem jî ji aliyê dîzayna helbest û pirtûkan ve cuda ye.
Mînak ev helbest û dîzayna wê
“yan were
însafê canî
bêzar nezarîne,
peyvên eşqê li min
heram neke tu; yan jî
bibe gul, da ku ez bizanibim
bibim xar, bibim kelem, min bide
şermê/yan bibe keçikeke xewneşevî bikişe
paşika min, yan jî min di xewnên şevan de hişyar
neke, bila mirina sîkoneyî tev li emrê min nebe/ yan were
bi şêla Lîlîtûya Somerî, bi xezeba wê pîreboka cêc a „No?
ya evînkuj; yan jî bihêle ez bibim bayekî xemdiz, bi her
piçikên xwe hembêz bikim bejna te ya mûyane
ya demdiz/ yan were bi maçeke harenarî min
di hilma xwe de bijenîne, yan jî di binê
ewrekî sayî de min ji dojeha xwe re
bike miriyekî nenas/ bila qijikê
gewdeberate laşê min ji hev
biçirînin, bila bi xwîna
min çîlik bide ew
riwekên ziwa,
xem nîne
ey yar”
M. Zahîr Kayan kî ye?
Helbestvan û wênesaz M. Zahîr Kayan li Agiriyê hatiye dinê. Zanîngeha Erzeromê Beşa Turkolojiyê xwendiye. Ji destpêka salên 1990'î ve nivîsên wî di rojname û kovarên wekî Ozgur Gundem, Welat, Welatê Me, Jiyana Rewşen, Tîroj û hwd. derketine.
Ew ligel nivîsîna helbestan wêneyan jî çêdike û bi wêneyên li ser mîtolojiya kurdan re eleqedar e. Heta niha gelek wêneyên wisa ku çêkirina, dîwar xemilandine. Ev van her du xebatên xwe jî didomîne.
Pirtûkên wî yên ku derketine:
- Destanek ji bihuşta winda, 1993, Weşanên Berfîn
- Arzena, 2001, Weşanên Sî
- Şêhnameya Dînan, 2014, Weşanên Şemal
- Hîç, 2022, Weşanên Nûbihar
- Asoya Peyvên Sermest / M. Zahir Kayan / Nûbihar / 192 rûpel / 2022 / Helbest