STENBOL-Diyarname

Bi sê xalan destpêk, pêşketin û dawiya nûçeyekê. Di sedsala 21'ê de rewşa kurdan ev e. Fermo:

KONSER:

Navenda Çanda Mezopotamyayê (NÇM) bi navê “Emê Bêjin” 17’ê mehê dê li Salona Yahya Kemal Beyatli ya li Kuçukçekmeceya Stenbolê konserek dê li dar bixista. Li gor bernameyê dê Koma Rastek, Mehmet Atli, Erdogan Emîr û hunermendên Şahiya Stranan beşdar bibana. Lê Qeymeqamiya Kuçukçekmeeyê bi îdîaya “Dê bibe sedema xirakirina pergala raya giştî û asayişa giştî” konser qedexe kir. 

BINÇAVKIRIN: 

Ji bo şermezarkirina qedexeyê hunermendên NÇM’ê, mebûsê HDP’ê yê Stenbolê Musa Piroglu û gelek kesên din îro li ber Salona Yahya Kemal Beyatli hatin ba hev û xwestin vê qedexeyê şermezar bikin. Ji bo vê yekê dê daxuyanî bidana çapemeniyê. Lê polîsan êrîş kir û gelek kes hatin binçavkirin. Pîroglu wisa got, “Neyartiya desthilatdarî ya li hemberî çandê, li hemberî kurdan û zimanê kurdan didome.”

Hat gotin ku 25 kes hatine binçavkirin û ew birine Emniyeta Stenbolê ya li ser Kolana Vatanê.

ISRARA KONSERÊ:

Piştî van yekan NÇM’ê bi ser tora civakî re ragihand ku ligel her tiştî ew dê konserê çê bikin, lê ne li wê salonê, li Salona Rêxistina HDP’ya Bagcilarê. Li gor daxuyaniyê roja şemiyê (îro) saet 19.00’an de ligel her tiştî dê li Bagcilarê konsera xwe saz bikin.