Diyarname
Enstîtuya Kurdî ya Stenbolê îro 3'yemîn Kongreya Xwe ya Asayî li dar xist û di kongreyê de zimanzan Zana Farqînî wekî Serokê Enstîtuyê hat hilbijartin.
Kongreya Enstîtuyê li avahiya wê ya li Unkapaniya Stenbolê li dar ket. Piştî deqeyeke rêzgirtinê Serokê Enstîtuyê Sami tan axivî û da zanîn ku di vê demê de enstîtuyê gelek pêş ve çûye. Tan ji bo rêveberiya nû hêviyên xwe anî ziman û got: "Hêviya min ew e ku xebatên ji bo ziman me kirine bi rêveberiya nû xurtir bidome."
Piştî axaftinan rapor hatin xwendin û hilbijartin pêk hat. Tekane lîsteya ku hate dengdan bi dengên delegeyan hat qebûlkirin. Di dawiyê de zimanzan Zana Farqînî (Mehmet Gemsiz) ji bo Serokatiya Enstîtuyê hat hilbijartin.
Enstîtuya Kurdî ya Stenbolê ku di 18'ê avrêla 1992'yan de hatiye avakirin, di van çend salên dawî dre wekî komele bi awayekî fermî bi navê Komeleya Enstîtuya Kurdî ya Stenbolê karê xwe dike. Enstîtu, her sal li ser navê zimanzan Feqî Huseyên Sagniç di meha adarê de "Xelata Ziman a Feqî Huseyîn Sagniç" dide. Enstîtu niha li avahiya xwe ya li Unkapaniya Stenbolê xebatên xwe dike.
Di lîsteya ku Zana Farqînî wekî Serokê Enstîtuyê hat hilbijartin de ev kes ji bo rêveberiyê hatin hilbijartin: Sami Tan, Ronahî Onen, Edip Korkmaz, Ruşen Bana, Ali Aslan, Nurullah Burçini.