Cemil OGUZ

41’emîn Festîvala Fîlman a Navneteyî ya Stenbolê bi merasimeke ku li Cemal Reşît Rey li dar ket dest pê kir. Lîstikvan Gulsen Tuncer got, “Festîval ji bo me bû dibistanek”.

Festîvala ku ji aliyê ÎKSV’ê ve tê organîzekirin bi merasimek dest pê kir. Merasima ku lîstikvan Cem Davran pêşkêşvaniya wê kir, ji Tirkiye û derveyî Tirkiyeyê gelek derhêner, lîstikvan û sînemahez beşdar bûn. Serokê Lijneya ÎKSV’ê Gorgun Taner plaketên sipasiyê dan yên piştgirî didin festîvalê.

Di şevê de Xelatên Rûmetê yên Sînemayê jî hatin belavkirin. Îsal ev xelat dan du jinên lîstikvan. Yek ji wan Gulsen Tuncer bû. Tuncer xelata xwe ji destê derhêner Engin Ayça girt û kêfxweşiya xwe wisa anî ziman, “Ev 41 sal in me berhemên muhîm bi saya festîvalê nas kirin. Festîval ji bo me bû wekî dibistaneke. Fîlmên me hatin nîşandayîn, min wekî endamê juriyê têde cih girt. Niha ez ji vê dibistanê mezûm bûm.”

Lîstikvan Meral Çetinyaya ku wê jî xelata xwe ji destê lîstikvan Guler Okten girt, wisa got, “Festîval ji bo me bû wekî xurekê, rêya fikirînê, tehamula ji bo jiyanê, wekî Meral jî got, bû wekî dibistanê.”

BI HEJMARA FESTÎVAN

Festîval bi awayekî fermî di navbera 8-19’ê mehê de li dar e. Ji bo çapemenî duh nîşandayîna fîlman dest pê kir û îro (8’ê mehê) dê temaşevan bikaribin li fîlman temaşe bikin. Di 12 rojên festîalê de 135 fîlmên metrajdirêj û 22 kurtefîlm dê bêne nîşandayîn. Di bin 14 beşan de ji 43 welatan fîlmên 164 derhênerî têne nîşandayîn. Di dema nîşandayîna fîlman de ligel derhêner û lîstikvanan dê gotûbêj jî hebin.

PÊŞBAZIYÊN FESTÎVALÊ

Di beşên Pêşbaziya Navneteweyî û Neteweyî, Pêşbaziya Hostayên Ciwan, Pêşbaziya Belgefîlm û Pêşbaziya Kurtefîlman, bi temamî 5 pêşbazî hene û fîlmên bi ser bikevin di merasima dawîkirina festîvalê de dê bêne xelatkirin. Bi temamî 57 fîlm di pêşbaziyan de ne.

FÎLMÊN DESTPÊKÊ ELEQE DÎT

Di şevê de fîlmê derhêner Andreas Dresen ê bi navê “Rabiye Kurnaz George W. Bush’a Karşi” (Rabiye Kurnaz Dijî George W. Bush e) hat nîşandayîn. Fîlm îsal li Festîvala Fîlman a Berlînê Berlinaleyê hatibû nîşandayîn û serlîstikvana fîlmî Meltem KaptanXelata Lîstikvana Herî Serketî girtibû. Her wiha fîlmî Xelata Senaryoya Herî Serketî û Xelata Yekîtiya Sînemayên Hunerê jî girtibû. Fîlmê ku eleqeyeke baş dît, çîroka kurekî bi navê Murat Kurnaz ê ku çûbû Afganistanê û paşê hatibû girtin, ew biribûn Girtîgeha Guatemalayê dike. Fîlm bi hestên însanî û ji aliyê hiqûqî ve meseleyê bi awayekî serketî digire dest.

Derhênerê fîlm Andreas Dresen, lîstikvan Meltem Kaptan û Aleksander Scheer di şevê de amade bûn û silav li temaşevanan kirin.

SALONÊN SÎNEMAYÊ

Îsal li Beyogluyê li salonên Atlas 1948, Sînemaya Beyoglu, Odîtoryûma Muzeya Perayê; li  Nîşantaşi li  CineWAM Premium+ City's (Salon 3 û Salon 7) û li Kadikoyê li Sînemaya Kadikoyê û li Sînematek/Sînema Evî ya Şaredariya Kadikoyê fîlm têne nîşandayîn. Ligel nîşandayîna fîlman sohbet, gotûbêj, panel û konser jî hene.

FÎLMÊN DERHÊNERÊN KURD

Îsal 5 derhênerên kurd bi fîlmên xwe di festîvalê de ne. Ji van derhêner kurd Behmen Qubadî bi fîlmê xwe yê nû “Çar Dîwar” (Dort Duvar / The Four Walls) beşdar dibe. Fîlm di beşa Pêşbaziya Neteweyî de ye. Derhêner Alî Kemal Çinar jî bi fîlmê xwe yê nû di beşa Pêşbaziya Neteweyî de ye. Çinar vê carê “Beriya Şevê* (Geceden Once / Before the Night) kişandiye.   

Ji derhênerên Başûr derhêner Şewket Emîn Korkî jî bi fîlmê “Ezmûn” (Sinav/ The Exam” di beşa Ji Festîvalên Dinyayê de dibe mêvanê festîalê. Fîlmê derhener Kurdwin Ayub ê bi navê "Sonne" di beşa Ji Festîvalên Dinyayê de tê nîşandayîn. Her wiha derhêner Serhat Karaaslan jî bi kurtefîlmê xwe “Suçlular” di festîvalê de cih girtiye. 

Li gor agahiyên ku me ji amadekarên festîval girtin ji bilî Kurdwîn Ayub, derhênerên din ên kurd Behmen Qubadî, Alî Kemal Çinar, Şewket Emîn Korkî û Serhat Karaaslan dê beşdarî festîvalê bibin û piştî nîşandayîna fîlm bersiva pirsên temaşevanan bidin.

 ***

Nûçeyên Eleqedar:

- Hin panel û gotûbêjên li ser sînemayê 

- Festîvala Stenbolê, fîlmên 5 derhênerên kurd têne nîşandayîn 

- Serokê Juriya Pêşbaziya Navneteweyî diyar bû 

- Festîvalê fîlmê ku dê restore bike diyar kir 

- Endamên Juriyê yên Festîvalê diyar bûn 

- Xelatê Rûmete ê Sînema hamey eşkerakerdin 

- Serokê Juriyê Festîvaley Stenbolê eşkera bî 

- Festîvala Stenbolê li benda fîlman e

 ***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.

***