Diyarname
Li gor çavkaniyên Ofîsa Serokomariya DYA'yê ji bo Serokomariya Iraqê yekî ji Rojava tê hilbijartin.
Par payîzê li Iraqê hilbijartin hat çêkirin û hê jî hikumet saz nebûye. Berî vê divê Serokomarek ji bo Iraqê bê hilbijartin. Postê Serokomariya Iraqê di di destê kurdan de ye. Heta niha her ji YNK'ê kesek bûye serokomar. Vê carê hem YNK'ê hem PDK'ê kesek kir berendam û li ser navek li hev nekir. Civîna herî dawî 30'ê adarê li dar ket û dîsa kes ji bo Serokomariya Iraqê nehat hilbijartin, civîn ji bo demek nediyar hat taloqkirin. Li ser vê yekê rêveberiya Dewletên Yekbûyî ya Amerîkayê (DYA) kete dewrê.
DENGÊ AMERÎKAYÊ RAGIHAND
Li gor nûçeya beşa kurdî ya Dengê Amerikayê ji Ofîsa Serokomariya DYA'yê daxuyaniyeke hatiye belav kirin û wisa hatiye gotin: "Ji ber ku her du partiyên mezin ên Başûr her yekê pişta xwe da aliyek û ji bo serokomariyê li hev nekirin, em ji bo yekî ji Rojava bînin me li hev kir. Di nav du sê rojan de emê navê berendamê Serokomariya Iraqê ragihînin."
Piştî vê yekê me xwe gihand rojnameger Mutlu Çiviroglu ku baş bi rewş û rêveçûya Oval Ofîsê dizane. Li gor gotina Çîvîroglu çend nav hatine diyarkirin lê bi şertê ku em navan neweşînin eşkere nekir, lê ev yek lê zêde kir, "Bi giştî li ser 3 navên ji Rojava nîqaş hene. Lê ji wan didu derdikevin pêş. Yek jê ji Qamişlo ye, ya din ji Amûdê ye."
'VÊ HEFTEYÊ NAV EŞKERE DIBE'
Li ser pirsa "Çima DYA kete dewrê?" jî rojnameger Çiviroglu wisa got, "Tê zanîn DYA li Iraqê cihek wê yê muhîm heye. Ji bo partiyên Başûr jî ji salên 90'î ve her li piştgiriya wan bû. Dema fêm kir ku ew li ser navek li hev nekirin, wekî rêya sêyem ket dewrê. Texmîna min nava vê hefteyê dê berendamê Serokomariya Iraqê eşkere bikin."
Ger heta niha we ev nûçe xwendibe, bizanin ku îro roja 1'ê Avrêlê/Nîsanê ye.