RIHA

"Nobeda Edaletê" ya ku Malbata Şenyaşar li ber Edliyeya Rihayê dabû dest pê kirin kete sala xwe ya diduyan. Ji bo vê yekê îro nûnerên partiyên siyasî, rêxistinên sivîl û parêzvanên mafê mirovan bi girseyî çûn cem malbata Şenyaşar. Di daxuyaniya hate dayîn de hat xwestin ku di serî de rayedar, her kes qîrîna malbata Şenyaşar bibihîze.

BI SEDAN KES LI BER EDLIYEYÊ BÛ

Hevserokê KCD'ê (Kongreya Civaka Demokratîk) Berdan Ozturk, Hevseroka DBP'ê Salîha Aydenîz, Berdevka HDP'ê Ebru Gunay, Parlamenterên HDP'ê Omer Ocalan, Feleknas Ûca, Ayşe Surucu, endamên Meclisa Dayikên Aştiyê, malbatên girtiyên nexweş û girtiyên berdana wan hatiye taloqkirin ên li Amedê Nobeda Edaletê digirin, nûnerên CHP’ê, rêveberên ÎHD'ê yên Riha, Meletî, Amed, Şirnex, Êlih, Mêrsîn û Semsûrê, rêveberên Komeleya Hiqûqnasên Ji Bo Azadiyê (OHD) ên şaxên Amed, Dîlok, Mêrsîn û Rihayê, nûnerên hemû baroyên herêmê, rêveberên KESK'ê, yên TÎP û DEVA'yê yên Rihayê û bi sedan kesên din hatin ber edliyeyê.

Yên hatin ber Nobeta Edelatê heta êvarê dê li wir bin. Her wiha ji bo axaftinê li ber edliyeyê Kursiya Edelatê hat danîn û nûnerên partiyên siyasî û saziyên sivîl axivîn.

GUNAY: DADGER NE ALÎGIRÊN EDALETÊ NE

Berdevka HDP’ê Ebrû Gunay ku axivî got : “Nobetê salek li pey xwe hişt. Ligel hemû zext û zordariyan jî Emîne Şenyaşar nobeta xwe domand. Êdî ev nobet nobeta bi mîlyonan însan e. Daxwaza wan daxwaza bi mîlyonan însanan e. Dayika me Emîne bi awayekî sîstematîk bi îşkenceyê re rû bi rû ma. Mixabin dozger û dadger ne alîgirên edaletê ne. Ew di nav rewşa ku kujeran diparêze de cih digirin. Em ê her li cem malbatê bin. Ne salek çend sal jî derbas bibe heta ku edaleta rasteqîn were em ê piştgiriya malbatê bikin."

PARÊZERÊ MALBATÊ: BILA BARO DAXIL BIBIN

Parêzerê malbatê Bulent Duran jî wisa got: "Qîrîna me ji bo darizandinek adil û bêalî ye. Baro jî dikarin daxilê vê dosyeyê bibin. Tenê bila neyên serdanê û piştgirî nedin, bila rasterast daxilî pêvajoyê bibin. Qîrîna dayika Emîne qîrîna edaletê ye. Wezîfeya her kesî ye ku guh bide vê qîrînê.”