Diyarname

Telîfa alê jî tê kirîn? Erê. Bi çi qasî? Bi 14 mîlyon dolarî. Ev ne henek e. Bûyer wisa çêbû: Hikumeta Avustralyayê bi 14 mîlyon dolarê amerîkî telîfa ala Aborjînan kirî.

Çîroka alê bi vî rengî ye: Hunermendê aborjîn Harold Thomas di sala 1971'ê de ev al saz kiriye û ev 50 sal in di çalakiyên gelê herêmê aborjînan de tê bikaranîn. Lê Thomasî ev mafê telîfê yê bikaranîna alê dabû hin kompaniyan, loma jî di raya giştî de bikaranîna alê bûbû meseleya nîqaşê. Mînak Thomas telîf dabû kompaniya kincan WAM'ê. Dema Lîga Futbolê ya Avustralyayê al bikar anî bû, WAM'ê der barê federasyonê de doz vekiribû. Wekî vê li Avustralyayê hin nîqaş derketibû. Di encama nîqaşan de hikumeta Avustralyayê ji bo çareserkirina meseleyê ket nava tevgerê û ligel hunermend Harold Thomas rûnişt. Hikumetê mafê telîfê yê alê bi 14 mîlyon dolarî ji wî girt. Serokwezîrê Avustralyayê Scott Morrison got, "Bi vê peymanê ji bo avustralyayiyan me ala aborjînan azad kir."

Hunermend Thomas jî wisa got, "Ez hêvî dikim bi vê peymanê wê gelê aborjînê û avustralyayî bêyî guherandina alê, bêyî astengiyan, bi serbilindî êdî alê bikar bînin."