Vê hefteyê 7 fîlm ketin vîzyonê: ''Juno'', ''Paranoid Park'', "Karê Bankeyê", ''Uçurtma Avcisi'', ''Ara'', ''Anestezi'', ''Girdap''. Fîlmên bi aksiyon li pêş in vê hefteyê lê pêyniyaza me fîlmê "The Bank Job" e ku têkiliyên dewletekê û dizan û encama paqijiyeke ji ruşvetkaran pêşkêş dike.
Banka İşi / Karê Bankeyê
(The Bank Job)
Derhêner: Roger Donaldson
Lîstikvan: Jason Statham, Saffron Burrows, Daniel Mays, David Suchet...
Cure: Hêrsdarî
Sala Kişandinê: 2008
35 sal berê li Londona Îngilistanê kaseyên bankeyekê têne talankirin ji aliyê dizan ve. Ev diziya mezin ku hê jî tam kes nizane çiqas pere û tiştên din jê hatine birîn qet zelal nebû ka kî dizî kiriye. Û ev dizî niha bi navê "The Bank Job" ket vîzyonê. Fîlmê ku derhêneriya wî Roger Donaldson kiriye Jason Statham û Saffron Burrows rola serlîstikvanî girtiye ser milên xwe.
Fîlmê hêrsdar, entrîka, skanla, talûkeyan hemû di nava xwe de dihebîne, "Çîroka seks, kuştin û karên qirêj" pêşkêş dike. Û di dawiya fîlm de kirêtiya mebûs û polîsên welatekî, di encamê de jî çûyîna ber bi paqijî û demokrasiyê ve ya welatî tê pêşkêşkirin.
"The Bank Job" ê bi heyecan hêjayî temaşekirinê û ji ber vê em wekî fîlmê hefteyê pêşkêş dikin.
***
Juno
Derhêner: Jason Reitman
Lîstikvan: Jason Bateman, Jennifer Garner , Ellen Page...
Cure: Dram / Komedî
Sala Kişandinê: 2007
Zarokên di temenê wê de di MySpace an di Facebookan de rûpelên xwe nû dikin lê Junoya (Ellen Page) ya ji Minnesota li gor xwe jiyana xwe dijî. Piştî nîvroyeke ku wekî her gavê bi diltengî derbas dibe, ew bi hevalê xwe Paulie Bleeker (Michael Cera) re pevşadibe. Piştî vê pevşabûnê bêyî planeke wan a wisa hebe ew biheml dibe û hevala wê Leah (Olivia Thirlby) li malbateke digere ku zarokê wekî weled bigire cem xwe. Di encamê de Juno'ya ciwan rastî gelek pirsgirêkan tê û dike ku bi hêza ciwaniya xwe van pirsgirikan çareser bike...
***
Girdap
Derhêner: Talip Karamahmutoglu
Lîstikvan: Ozan Bilen, Ali Surmeli, Fuat Saka, Selçuk Yontem...
Sala Kişandinê: 2008
"Girdap" (Gerînek) li ser çîroka Umutê ku ji Antalyayê ji bo xwendinê tê Zanîngeha Stenbolê, li malekî kirê digere, tevî sê kesan mal kirê dike, bi rêya hevalên xwe diçe mizgeftê nimêj dike, dûre diçe cem xoceyekî û berê ve ber bi kesekî ku dê çalakiya întîxarwarî bike diçe.
Fîlm ji çîrokeke rastîn hatiye girtin. Kesek ku di nav oldarên radîkal de xwe ji bo çalakiya întîxarwarî amade dike pêşkêş dike. Û di dawiyê de fîlm nîşan dide ku kesek çawa tê bi rêxistinkirin, çawa tê xapandin û CIA wan çawa bikar tîne...
Di fîlm de lîstikvaniya Ali Surmeli hêjayî temaşekirinê ye. Her wiha hunermend Fuat Saka yekem car di fîlmekî de dilîze.
***
Paranoid Park
Derhêner: Gus Van Sant
Lîstikvan: Taylor Momsen, Scott Patrick Green, Daniel Liu...
Cure: Dram
Sala Kişandinê: 2007
Derhêner Gus Van Sant berê kameraya xwe dide zarokên li Paranoid Parkê. Yên ji bo kaykay diçin wir, yên ji bo sûtalî... Lê di dawiyê de bêyî hemdê xwe Alex bi kaykaya xwe li peywirdarekî wir dide û ew dimire. Bûyer sero bino dibin.
Fîlmê ku ji romana Blake Nelson hatiye girtin, li ser rewşa ciwanan disekine.
***
Uçurtma Avcisi / Nêçîrvanê Bafirokê
(The Kite Runner)
Derhêner: Mark Foster
Lîstikvan: Shaun Toub, Nasser Memarzia, Atossa Leoni...
Cure: Dram
Sala Kişandinê: 2008
Nivîskarê afgan Khaled Hosseini (Xalit Huseyniî) ji heman romanê “Uçurtma Avcisi - The Kite Runner - Nêçîrvanê Bafirokê” fîlm kişandiye. Koçberekî afgan Amir dibihîze ku serê kurê Hesen ê hevalê wî yê zaroktiyê di belayê de ye. Ji bo alîkariyê vedigere Afganistanê di bin reveberiya Taliban de. Çîrok li Afganistanê derbas dibe. Romana ku di raya giştî de gelek hat ecibandin, piştî demekê dê rewşa wê ya vîzyonê diyar bibe ka di vîzyonê de jî vê serketinê bi dest dixe yan na.
***
Ara
Derhêner: Umit Unal
Lîstikvan: Serhat Tutumluer, Erdem Akakçe, Betul Çobanoglu...
Cure: Dram
Sala Kişandinê: 2007
"Ara" (Navber) çîrokan çar kesan, çar kesên ku ji hev pir hez dikin lê di heman demê de hev dixapînin, dilê hev dişkînin lê di heman demê de nikarin ji hev veqetin pêşkêş dike.
Paşeroj, evîn, xirecir, îtîraf û çîroka kesên 'di navberê de' mane...Çîroka deh sala a çar kesan di "Ara"yê de derdikeve pêşberî temaşevanan.
***
Anestezî
(Awake)
Derhêner: Joby Harald
Lîstikvan: Terrence Dashon Howard, Jessica Alba, Hayden Christensen,
Christopher McDonald...
Cure: Dram / Hêrsdarî
Sala Kişandinê: 2007
Clay (Christensen) di dema ku qeyrana dil derbas dike rewşa "fêmkirina anestezîk" de dimîne û dijî.
Yanê her tiştê ku dibe ew bêyî razê fêm dike, bi hemû êşê hîs dike lê ji ber bandora anestezî laşê wî li hemberî tu tiştî reaksiyonê nîşan nade. Û tiştê xirab jî haya koma ku emeliyetê dikin ji vê yekê nîn e.
Di vê navberê de jina Clayê ciwan Sam (Jessica Alba) mecbûr e biryarên nû û zor bigire, Clay jî di bîra xwe de dikeve nava rêwêtiyeke...