QAMIŞLO

Gerînendetiya Sotemeniyê ya Qamişlo berî demsala zivistanê dest bi belavkirina mazotê kir. Ji bo her malbatê dê 440 lître mazot bê dayîn.

Gerînendetiya Sotemenî ya Kantona Qamişlo dest bi belavkirina mazotê li ser tax û navçeyên bajêr kir. Ji bo ku xebatên xwe bi rêxistin bikin, gerînendetiyê îsal pergala kartên sotemeniyê guhart û li şûna wan kartên bikod bi kar anîn.

Gerînendetiya Sotemeniyê îsal girîngî da gund û şaredariyan, her ji bajarokê Kerbawî, Sîkar, Çilaxa û Koçerat dest pê kir û dê li bajarokê Tenoriyê yê Qamişlo dewam bike.

Her malbatek dê 440 lître mazot bi nirxê 75 lîreyên Sûriyê hilde û hejmara malbatên li gerînendetiyê hatine tomarkirin derdora 40 hezarî ye û dema ku meclisên wan kartan radestî şêniyên bikin, dê mazotê li ser bajar û navçeyan belav bikin.

Mazot bi rêya sîtêrên taybet bi hevkariya komînan belav dikin.

Li herêma Cizîrê li gorî herêmên din ên Bakur û Rojhilatê Sûriye hihek bi derengî sotemenî hat belavkirin.

Rêveberê Gerînendetiya Sotemeniyê ya Herêma Cizîrê Ebdulselam Ebas diyar kir ku, mîqdara mazotê ya ku dê di herêma Cizîrê de îsal were belavkirin derdora 200 mîlyon lître ye.

Ebas bang li şêniyên ku kartên nû negirtine kir ku ji komîn û meclisên xwe wergirin.

ANHA