Diyarname

Mamoste û nivîskar Çorê Arda piştî romanan û pirtûkeke rexneyê vê çarê pirtûkeke çîrokan pêşkêşî xwendevanên kurdî kir: "Mêşo".

"Mêşo" pirtûka dawî ya Çorê Arda ye. Pirtûka çîrokan ji aliyê Weşanên Payîz ve hat weşandin.

Çorê Arda berê du roman derxistibûn. Kurtedemek berê pirtûka wî ya ji nivîsên rexneyî pêk hatî bi navê "Rexne û Rexnegirî" ji Weşanên Belkî derketibû û niha wî pirtûkeke çîrokan jî gihand ber destê xwendevanên kurdî.

Li nav kurdan piranî bi helbest û çîrokan kes dest bi nivîskarî dikin û ber bi romanê ve diçin lê yê Çorê Arda hinek cuda çêbû: Pêşî roman derketin paşê çîrok. Ew dibêje, "Ez her tiştî diceribînim. Sînorê wêjeyê li cem min tune ye. 

Roman li gor çîrokan hêsantir e. Çîrok jî li gor helbestan hêsantir e bi ya min. Lê ez ê romanên xwe bidomînim. Rexne ji gişan zortir e. Di wêjeyê de lêgerîn heta ku ez sax bim dê bidome. Çimkî sînorê wêjeyê tune ye."

Arda ji dema dest bi nivîskarî kiribû ve çîrok nivîsandibûn, ceribandinên wî di vî warî de hebûn lê ji van kêm neweşandibûn, niha wekî pirtûk weşand. Ew dibêje, "Çîrok min ji ewil de nivîsandibû. Dema min nû dest bi nivîskariyê kir. Ya duyem jî, her çîrok mijarekê dihûne lê roman piranî li dora mijarekê tenê diçe û tê. Yanê di çîrokê de cure cure mijaran û karakteran tu dikarî hilbijêre lê di romanê de tiştekî wiha tune ye."

Di pirtûkê de bi navê "Axaftina Bêdeng", "Berdûşo", "Dîwar", "Ez kûçiko!", "Herbeke Serserkî", "Lempeyeke Tenîgirtî", "Mêşo", "Nifte", "Monolog", "Nizanim", "Qerto, "Dar(gul)îk" "Saet", "Serdar", "Serpiştê", "Sifre", "Şanoya di Derecekan de", "Tecawiz", "Wîrjînya", "Xewn e-(reşek)", "Xwedayê Têkçûnê" 21 çîrok cih girtine.

ÇORÊ ARDA KÎ YE?

Çorê Arda di sala 1979'an de li Herêma Dêrika Çiyayê Mazî ya Mêrdinê hatiye dinê. Dibistana seretayî û navîn û l îse li Dêrikê xwendiye. Wî Zanîngela Dîcleyê beşa wênesaziyê qedandiye. Ew niha li Dêrikê mamostetî dike. Heta niha gelek nivîs û çîrokên wî di kovarên wekî Çirûsk, Heterotopîa, Felsefevan, Axa Sor de derketine. Arda ji destpêka 2019'an ve di Diyarnameyê de qunciknivîkarî dike. Ew di quncikê xwe yê bi navê "Bêwate" de nivîsên xwe yên nirxandinî pêşkêşî xwendevanan dike.

Pirtûkên wî:

- 496, Weşanên Belkî, 2016, Roman

- Roman, Weşanên Belkî, 2017, Roman

- Rexne û Rexnegirî, Weşanên Belkî, 2021, Teorî

- Mêşo, Weşanên Payîz, 2021, Çîrok