Diyarname

Hikumet û walî nahêle sendîka 1'ê Gulanê li Taksîmê pîroz bikin, sendîka jî israr dikin. Û niha OHAL (Rewşa Awarte) hat Stenbolê.

Ev çend roj e sendîkavan dixazin li Taksîmê 1'ê Gulanê pîroz bikin. Lê hikumet, waliyê Stenbolê vê yekê naxwazin. Û ev hefteyeke hevdîtin, daxuyaniyên dijberî hev û yên li ser vê yekê her têne dayîn.
Hevdîtina dawî ya ji bo 1'ê Gulanê îro di navbera sendîka û nûnerên hikumetê de pêk hat lê dîsa jî li hevkirin pêk nehat. Li ser vê yekê rêveberiya Turk-Îşê biryar da ku li gor biryara hikumetê tevbigere. Hikumet dixwaze tenê nûnerên sendîkayê derkevin qada Taksîmê, çelengek deynin cem peykerê û derkevin, lê sendîkayan ev yek qebûl nekidir. Îro Turk-Îşê diyar kir ku dê li gor biryara hikumetê tevbigere. Lê sendîkayên din ên wekî KESK, DÎSK vê yekê qebûl nakin.

Agahiyên dawîn ên li ser 1'ê Gulanê yên li ser Taksîmê:

- Turk-Îşê li ser pîrozbahiya ku dê bikin got: "Lijneya Rêveberiya Turk-Îşê û sendîkayê pêre girêdayî dê li gor destûra walîtî dê çelengê deynin Kazanci Yokuşu û Peykera Taksîmê, rêzgirtina ji bo hurmetê pêk bîne."

- Turk-Îşê ev biryar girt lê sendîkayên wekî Hava îş, Petrol îş, TUMTÎS, Kristal Îş ku girêdayî Turk-Îşê ne diyar kirin ku dê dev ji pîrozbahiya 1'ê Gulanê ya li Taksimê bernedin.

- Waliyê Stenbolê Muammer Guler got: Emê bi tu awayî destûrê nedin pîrozbahiyên li Taksîmê. Li hemberî çalakiyeke derqanûnî li gor zagonan emê mudexele bikin.

- Saziyên wekî Turk-Îş, DÎSK û KESK ev çend roj bûn bang li gel kiribûn ku dê bi beşdariyeke mezin li Taksîmê 1'ê Gulanê pîroz bikin. Serdozgeriya Komarê ya Beyogluyê îro eşkere kir ku li ser vê daxwazê der barê rêveberiyên van saziyan de lêpirsên daye dest pê kirin. Serdozger diyar kir ku digel ku ji aliyê rayedaran ve hatiye qedexekirin wan derveyî zagorê bang kiriye ji bo meşê.

- Komeleya Hiqûqnasên Hemdem diyar kir ku dê vê 1'ê Gulanê de çalakiyan bişopînin û helwesta waliyê Stenbolê û Şaredariya Bajarê Mezin ku hemû rêyên ji bo Taksîmê girtine û sefer jî betal kirine wekî 'helwesteke derveyî mirovahiyê' bi nav kir.

- Sekreterê Giştî yê DÎSK'ê Taygun Gorgun da zanîn ku digel sendîka, partiyên siyasî, odeyên pîşeyê û saziyên sivîl ewê 500 hezar kesî li Taksîmê bicivînin, bi qurnefîlên di destê wan de derkevin Taksîmê. Gurgon wisa got: Armanca me ne ew e em xirecirê derxin, em dixwazin di nav aştî û azadiyê de 1 Gulanê pîroz bikin.

Û seferên ku hatine betalkirin û rewş sibê dê wisa be:

- Ji Uskudar û Kadikoyê seferên keştiyan ên ji bo Karakoy, Kabataş û Beşîktaşê hatin betalkirin. Sefer tenê dê ji bo Eminonu bêne kirin.

- Xetaba tramvay a navbera Kabataş û Sîrkecî hate betalkirin.

- Pergala fînuku ya Kabata-Taksîmê hate betalkirin.

- Metroya di navbera Taksîm-Mecidiyekoyê de hate betalkirin.

- Otobusên ÎETT'yê ji bilî rawestgehên navendî dê li rawestgehên din de rêwiyan peya nekin û siwar nekin.

- Li Beyogluyê 41, li Şîşlî 19 û li Kagitganeyê 6 dibistan ji bo sibê hatin betalkirin.

- Ji niha ve li dora Taksîmê bi bariyeran hate pêçan.

Her çiqas Waliyê Stenbolê bibêje "armanca me ne ew e ku em tirsê hakim bikin" jî OHAL'a ku bi salan li bajarên kurdan bû cihê tirsê, niha li qada Taksîm û derdora wê bûye cihê tirsê.

Sibê tenê dê pirên Bogazê vekirî bin.

Foto ji malpera milliyetê hat girtin