AMED
Komeke alîgira Hikumeta AKP'ê ya ku navê "Tevgera Demokratên Şoreşger a Kurd" li xwe kiriye, duh bi şev li Amed, Êlih û çend bajarên din ên herêmê bi ser navê 'Yên dibêjin boykot, alîgirên JÎTEM û Ergenekonê ne' belavok belav kirin.
Di belavokan de ji bilî yên dibijên 'erê' herkes wekî alîgirên 'Ergenekonê' hatin binavkirin. Di belavokan de ligel hin derdorên kurd ên marjînal ku alîgiriya AKP'ê dikin, navên siyasetmedarên wekî Hevserokê BDP'ê Selahattîn Demîrtaş û Hevserokê KCD'ê Ahmet Turk jî di nav lîsteya 'erê' de hate nivîsandin.
Demîrtaş ev yek wekî bê exlaqiyeke mezin nirxand û wiha got: "Ev derdor li bendê ne ku Serokwezîr ji wan re bêje 'aferîn'. Bi van rêbazên qirêj nagihijin armanca xwe.

AKP di roja dawî ya beriya referandûmê de li bajarên Kurdistanê propagandaya xwe li ser komên taşeron û marjînal ên kurd dimeşîne. Koma ku navê 'Tevgera Demokratên Şoreşger a Kurd' li xwe kir bi şev daxuyaniyên balkêş belav kirin. Di daxuyaniyan de cih dan axaftin û peyamên kesên wekî; Kemal Burkay, Şerafettin Elçi, Bayram Bozyel, Rojîn, Yilmaz Odabaşı û Muhsin Kizilkaya yên ku piştgiriya AKP'ê û eniya 'erê' dikin.

Ya balkêş jî ew e ku li kêleka wan kesan, cih ji daxuyaniyên Hevserokê BDP'ê Selahattîn Demîrtaş, Hevserokê KCD'ê Ahmet Turk û parlementerê BDP'ê Nûrî Yaman re hate dayîn û hate îdiakirin ku ev siyasetmedar jî alîgirên 'erê' ne. Di belavoka korsan de hin nûçeyên çapemeniya nêzî AKP'ê yên ku hatine tekzîpkirin jî cih girtin.

Kurd wekî Ergenekonparêz bi nav kirin

Di belavokên komê de kesên ku ji guhertinên AKP'ê re bêjin "Na" û "Boykot" wekî alîgirên Ergenekon û darbeyê hatin binavkirin. Di daxuyaniya korsan de balkêş e ku hin daxuyaniyên siyasetmedarên kurd di nav yên alîgiriya AKP'ê dikin de hatin dayîn.

Demirtaş: Ew karê derdorên li benda 'aferîna' Serokwezîr in

Hevserokê BDP'ê Demîrtaş bertek nîşanî belavokên korsan ên ku li bajarên herêmê hatine belavkirin da û wiha got: "Hin komên marjînal tu pîvanên exlaqî nas nakin û ji bo piştgiriya AKP'ê û aferînekê ji wê bigirin her tiştî dikin. Ev propagandayeke reş e. Van derdoran xizmeta AKP'ê wekî karekî esasî ji xwe re diyar kiriye. Serokwezîr carekî seriyê van kesan mist bide, ew ê bibin mirovên herî kêfxweş ên cîhanê. Ew nikarin bi van propagandayan bigihijin encamekê."

'Ev bê exlaqiyeke mezin e'

Demirtaş, gotinên xwe yên wekî; 'Yên ditirsin biçin ser sindoqan bila alîkariyê ji me bixwazin' yên ku di belavokê de hatine bicihkirin nirxandin û wiha got: "Ev gotinên min nayên wateya ku ez gel dawetî ser sindoqan dikim. Hin derdor îdia dikin ku gel ditirse. Min ji bo bersiva wan bidim ev gotin got. Jixwe tiştekî wisa tune ye. Ev bê exlaqî ye ku gotinên min berovajî dikin ji bo xwe dikin mijara propagandayê."

Li ser mijarê Serokê BDP'ê yê Amedê Nîjad Yaruk jî got ku ev propagandayeke gemar û qirêj a derdorên HAKPAR û KADEP'ê ne. Yaruk got ev hewldan wekî kirinên nemerdane bi nav kirin.

Ji DÎHA'yê hatiye girtin