Berfîn Dîcle

Li japonyayê, tenê  ji bo jin biçinê, 80 heb zanîngeh hene. 

Ev zanîngeh ji bo keçikên ku dixwazin ji mêrê xwe re xizmetek baş bikin vebûne. 

Ji alî perwerdehiya zanyariyê ve pir girîngiyek wan tune ye. 

Yanî mirov dikare bêje, ji bo jin, xizmetek akademîk bidin mêrê xwe  hatine saz kirin. 

Ma qey dibe jin xwarinê çêke û deyne ser sifrê, mêrê wê bêje: Te çima wekî diya min ne pijandiye? 

Jina wî jî lê bifetilîne û bêje: Min, ne ji diya te, ji pîra xwe çawa dîtibe wisa pijandiye. 

Ma qey ev jî bûye mesela zimanê me. Em du rêzik dinivisînin, yek tê dibê, pîra min awa digot, kalê min wisa digot. Diya min, xaleta min, meta min cîrana min...

Em çawa di etiriya zimanek standart de ne jinên japonên reben jî di etiriya xizmetek standart de ne ku bidine mêrê xwe... 

Di zanîngehê de perwerdehiya bingehîn ev e... 

1-) Jinek gava serê sibê ji xew rabe, divê ewil çi bike? 

A- Mêrê xwe ji xew şiyar bike.

B- Taştê amade bike. 

C- Berî her tiştî ser û guhê xwe bide hev. 

D- Derî û cama veke.

E- Kaseta Şakiro deyne ser.

2-) Heger dor hat ser şiyarkirina mêrik, divê bi çi awa yî, camêr ji xew rake?

A- Wi bi ramûsanên xwe şiyar bike.

B- Ava qeşemê bipeşkîne rûyê wî

C- Bi serê pozê şimika xwe li zikê wî bixe

D- Balgîfê deyne ser dev û pozê wî, ji bo qet hişyar nebe.

E- Bi darê şivaniyê lê bixe

3-) Heger nîvê şevê mêrê we, xwe ber bi wê da û got: Xanim ez ketime bextê te, min dest vala nehêle. Hûnê bêjin çi?

A- Hûnê pişta xwe bidinê û bêjin serê min diêşê

B- Te çima nehişt diya min were li mala me bimîne?

C- Sibê min bibe çarşiyê hê ja.

D- Heta diya te ji mala me neçe tu bav û birê min î.

E- Begim, ez di hizûra te de amade me... 

4-) Heger hûn bi tolaziyek mêrê xwe hisiyan, hûnê çi bikin?

A- Hûnê xwelî li serê xwe bikin.

B- Hûnê ji bav û birayê wî re bêjin.

C- Hûnê xwe ker bikin û wî nedin şermê.

D- Hûnê herin ciyê karê wî, rakin gijika porê wê jinikê û bi erdê re bikşînin.

E- Wele begim, karê malê giran e. Heger yek di xizmeta te ya şevê de be. Ez ê jî ji xwe re xewek şêrin bikim...

Bi kurtasî divê li her bajarekî, li her gund û navçeyekî ev zanîngeh hebin!