Amed
Leyla Zana di semînera, 'Ziman û Siyaset'ê de got ku heta kurdî nebe zimanê siyasetê, pêş nakeve û mayînde nabe. Zana, xwest ku siyasetmedarên kurd kurdî di jiyana xwe ya rojene de bikin zimanê serdest.

Komeleya Lêkolîn û Pêşvebirina Zimanê Kurdî (Kurdî-Der) li avahiya xwe bi beşdariya parlementera DEP'ê ya berê Leyla Zana, Gerînendeyê Giştî yê rojnameya Azadiya Welat Tayîp Temel û Nivîskar Gulçîçek Gulen Tekîn bi navê, 'Ziman û Siyaset' panelek li dar xist. Di panela ku moderatoriya wê Kadîr Kokder kir de Serokê Giştî yê Kurdî-Der'ê Mazhar Aktaş axaftina destpêkê kir û xwest ku her kes kurdî bikin zimanê bingehîn ê jiyana xwe. Piştî Aktaş, Zana bi gotina, "Em di ku derê de hatibin fetisandin lazim e em ji wir dest pê bikin" dest bi axaftina xwe kir. Zana, destnîşan kir ku ji bo zimanek pêş bikeve lazim e civakî bibe û wiha axivî: "Gewriya min kurdî ye. Sedema vê yekê jî ew e ku ez kurdî di hiş û mejiyê xwe de hîs dikim. Dema me dest bi vê têkoşî kir, me got kî dikare di vê têkoşînê de çi fêde bide. Di aliyê ziman de jî lazim e em nebêjin ka kî dê çi ji me re bike. Divê em bi xwe bixebitin. Lazim e kurdî di warê teknîkî de jî pêş bikeve. Em zimanê xwe ji çand û hunera xwe digirin. Ku siyasetmedar zimanê dayikê bikar neynin dê ji gel dûr bikevin. Ev yek jî dê bandorek neyînî li ser ziman bike. Ku siyaseta civakekê bi zimanê civakê nebe, ew ziman pêşnakeve. Min tirkî li berderê girtîgehan û kurdî jî di girtîgehan de zanî. Ez bawerim ku her kurdek dikare zimanê xwe pêş bixe."

Di semînerê de Kadrî Gokdere jî ragihand ku heta di zimanekê de hest û raman tunebin di navbera mirovan de diyalog jî çênabe û ev tişt anîn ziman: "Birêz Ocalan dibêje ku qedexe dom bikin bila dayik li malan zimanê xwe hînî zarokan bikin. Em lazim e li gorî vê hasasiyetê bixebitin."

Nivîskar Gulçîçek Gunel Tekîn jî balkişand ser heqareta Serokwezîr Erdogan a li hemberî Serokê Baroya Amedê Sezgîn Tanrikulu û wiha got: "Erdogan ji bo mafê perwerdehiyê ji Tanrikulu re dibêje tu derewan dikî. Lê ez jî ji Serokwezîr re dibêjim tu derewan dikî. Zimanê kurdî bi rêbazên cuda tê tunekirin. Ligel hemû zordariyan nekarî zimanê kurdî ji holê rakin. Bi qampanyayan xwestin kurdan bikin tirk lê kurdan bi berxwedana xwe ev yek têk bir. Ji ber ku ziman hêmanek bingehîn a mirovan dike mirov e."

Gerînendeyê Giştî yê Azadiya Welat Tayîp Temel jî bal kişand ser rojnamegeriya kurdî û wiha got: "Dîroka rojnamegeriya kurdî dîroka fedakariyê ye. Bandora rojnamegeriyê ya civakî pir mezin e. Lazim e rojnamegerên kurd ji bo zimanek yekgirtî bibin yek. Bi polîtîkaya asîmîlasyonê dixwazin kurdî xilas bikin. Lê em dikarin bi medyayê vê yekê cardin têk bibin."

Ji DÎHA'yê hatiye girtin