Diyarname
Weşanên Avestayê ji Başûr pirtûka Selwa Gulî, ji ji kurdên Kafkasyayê jî pirtûka Şikoyê Hesen weşand.

Weşanên Avestayê xebata xwe ya pêşkêşkirina berhemên nû didomîne. Avestayê niha yek ji Başûr yek ji kurdên Kafkasyayê pirtûkên helbestan ên di helbestvanên kurd weşand.

Payîz û Ba

Şikoyê Hesen ji kurdên Kafkasyayê ye ku di jiyana wî de 3 pirtûkên wî yên helbestan hatine weşandin. Hesen ku ji ber alfabeya Kirîlî heta niha pirtûkên wî negihîştibûn kurdên parçeyên din, niha Avestayê pirtûkeke wî bi navê "Payiz û Ba" weşand.
Di pirtûka ku ji aliyê Tosinê Reşîd ve ji Kirîlî ji bo Latînî hatiye tîpguhêzkirin de li dor 80 helbestî têde cih digirin.
Şikoyê Hesen di sala 1928'an de li gundê Camûşvana Biçûk a bi ser Axbarana Ermenistanê ye hatiye dinê. Hê di 5 saliya wî de bavê wî dimire û apê wî xwedî lê derdikeve.
Hesen di sala 1953'yan de Zanîngeha Yêrîwanê Fakulteya Rojhilatnasiyê temam dike, demeke di Radyoya Yêrîwanê de dixebite.

Helbestvan Şikoyê Hesen ku yekem car di zanîngehê de helbestên xwe dinivîse, paşê helbestên wî bi rêya rojnameya Riya Teze digihîje xwendevanên kurd.
Di jiyana Hesen de pirtûkên wî yên bi navê "Qalçîçek" (1961), "Tembûra Kurdan" (1965) û "Merêmê dilê kurd" (1970) sê pirtûkên wî yên helbestan têne weşandin û piştî wefata wî jî  dîwana wî bi navê "Perwaza Welat" tê çapkirin.
Hesen ku di sala 1976'an de jiyana xwe ji dest dide wekî Mîkayîlê Reşîd, Sihîdê Îbo, Simoyê Şemo, Fêrikê Ûsiv yek ji helbestvanên kurd ê li Kafkasyayê ye ku tê nasîn.
Şikoyê Hesen di helbestên xwe de digel li ser çanda kurd, welatparêzî û motîfên kurdan, li ser Sosyalîzmê de jî disekine.

Şev Şahid e

Pirtûkeke din ku ji Avestayê derket jî pirtûka helbestan a Selwa Gulî ye ku ew ji Başûr e. Selwa Gulî li Dihokê tê dinê. Di salên 1980'yî de di nav tevgera siyasî ya kurd de cih digire û niha li Swêdê dijî.
Gulî ku nûnera PEN'a Kurd a Swêdê ye berhemeke wê di sala 2006'an de li Almanyayê bi navê "Severa Xewnêt Xema Min" hate weşandin.

“Şev Şahid e” di beşa "Şahmaran"a Avestayê de derket ku Avesta di bin vê beşê de berhemên jinên nivîskar ên kurd çap dike. Heta niha 12 berhem di bin vê beşê de hatine weşandin.
Di pirtûka ku li dor 20 helbestî cih digirin de di dawiya pirtûkê de ferhengokek jî hatiye pêşkêşkirin.

Kurteyeke ji pirtûkê:
Rondikêt kîjan dayikê bi lifka lewendiya xwe
Ya peritî ziwa bikim?
Qêrînêt kîjan çiyayî li xwe û we kom bikim
Kîjan zaroka bê xwedî hembêz bikim?

Li kê pîroz bikim vê kale-salê,
Li Şengalê yan li çiyayê Qendîlê?