Diyarname

Bloombergê daneyên Rêxistina Tenduristiyê ya Dinyayê, Bankeya Dinyayê û yên Neteweyên Yekbûyî dan hev, ji vê encama welatê herî bi tendurist derxist holê. Di nav krîteran de li ser xalên qelîteya hewayê, bikaranîna cixareyê, bi giştî temenê mirovan, asta obezîteyê û ava paqij hatiye sekinîn. Li gor encamê welatê herî bi tendurist Spanya derketiye. Spanya di sala 2017'an de di lîsteyê de di rêza 6'an de bû.

Li Spanyayê ligel van xalan di warê xwarinê de jî gelek li pêş e. Li Spanyayê asta obezîteyê di sedî 16.7 de ye, beramberî vê  li Amerîkayê sedî 38.2 obez in. Li Spanyayê asta mirina ji nexweşiyê dil û rehan gelek kêm bûye. Di warê tenduristiyê de Spanya ne ji aliyê pere xerckirinê de lê di warê başlixwe nêrîn û di encamê de kêm nexweşketinê de li pêş ketiye. Mînak DYA sê qazî zêdetir ji bo tenduristî pere xerc dike lê Spanya jê baştir e.

Di lîsteya hatiye amadekirin de piştî Spanyayê welatê Îtalyayê bûye duyemîn. Li Îtalyayê rewşa xwarinê ji ya Spanyayê baştir e ku asta obezîteyê sedî 9.8 e lê Spanya bi tiştên xwe yên din Îtalya derbas kiriye loma bûye yekemîn. Piştî van her du welatan bi rêzê Îzlanda, Japonya û Swîsreyê cihê xwe girtine. Li Japonyayê asta obezîteyê sedî 3.2 ye lê bi xalên din li paş maye.

Di nav 10 welatên herî baş de piranî welatên Ewropa hene lê ji bilî van ji Asyayê Japonya, her wiha Avustralya û Îsraîlê jî di nav 10'ên pêşî de cih girtine.

Dewletên Yekbûyî yên Amerîkayê di rêza 35'an de cih girtiye. Di warê welatên herî tendurist de Tirkiye nakeve nava 50 welatên pêş, lê di rêza 51'ê de cih digire.