Diyarname
Di çarçoveya Fûara Pirtûkan a Stenbolê de îro panela bi navê "Li ser gramera kurmancî xebata 15 salan" li dar ket. Şêxmûs Aslan ku xebata xwe ya li ser gramerê ji Weşanên Nayê derxistibû wekî panelîst beşdar bû û axivî.
Di panela Berfo Barî bi rê ve bir de Aslan got kurdî zimanekî qewîm e, zimanekî zelal e bi dehfan û qedexeyan nikare bê windakirin û li ser pêşketina wê jî got: "Ziman bi lêkolînên zanistî geş dibe."
Aslan ku li ser gramera kurdî sekinî, paşê qala dîroka xebatên li ser gramera kurdî kir û got: "Di vî warî de du cure lêkolîn hene. Yek jê lêkolînên li ser gramera kurdî ya ji aliyê biyaniyan ve û ya din jî ji aliyê kurdan bi xwe ve hatine kirin hene. Pêşî mîsyonerên biyanî li ser rêziman xebitîne. Ji van yê herî kevn Maurizo Garzo ye ku di sala 1787'an de li Misûlê lêkolîn kiriye û ev xebata xwe bi îtalî-kurmancî çap kiriye. Lêkolînên sedsala 19'an jî hemû ji aliyê biyaniyan ve hatine kirin. Yên kurdan jî pêşî Celadet Elî Bedirxan ligel Roger Lecos kiriye."
Zimanzan Şêxmûs Aslan paşê qala xebata Kamûran Bedirxan, Musa Anter û yên din kir û hat heta salên 2000'an. Aslan dûre qala gramera xwe, ferqa xebata wî û gramerên din kir û îdîa kir ku gramera wî ji yên din zelaltir e û got: "Ji bo baş rêziman fam bibe divê qeydeyên hêsantir hebin. Yên din ku gramer nivîsandine li ser nivîsan re gramera xwe saz kirine, min folklor, esas girt, di her mijarê de min dorçaralî girt dest û mînak dan."
Di dawî de Aslan got ku heta dibistan çêbin wê çaxê dê nirxandin çêbin, rêziman safî bibe, heta wê çaxê her kes li gor xwe dinivîse bila binivîse û divê hê pirtir gramer bêne nivîsandin.
**
Nûçeyên Eleqedar:
- Serokê TYB'ê: Dewlet ji cotkaran bacê nagire çima ji wergêran digire
- Hinek çalakiyên li TUYAP'ê, tenê yek bi kurdî heye
- Vane weşanxaneyên kurdan ên beşdarî TUYAP'ê dibin