Cemil Oguz

Bi merasimeke Fûara Pirtûkan a Stenbolê dest pê kir. Serokê TYB'ê (Yekîtiya Weşangerên Tirkiyeyê) Kenan Kocaturk pirs kir: "Dewlet ji cotkar û esnafan bacê nagire çima ji wergêran bacê digire?"

Li Ewropayê rekora beşdariyê
Careke din hezkiriyên pirtûkan ên li Stenbolê di bin banê TUYAP'ê de têne ba hev. Di fûara îsal ku 9 rojan dê bidome de bi sed hezaran xwendevan, her wiha nivîskar dê bên ba hev. Ji bo vekirina fûarê mesarimek li dar ket. Merasima destpêkirina 37'emîn Fûara Pirtûkan a Stenbolê li TUYAP'ê Beylîkduzu li Salona Karadenîz li dar ket. Di demasimê de Kordînatorê TUYAP'ê Denîz Kavukçuoglu axaftina destpêkê kir û diyar kir ku par 750 hezar kes hatine serdana fûarê, ev reqes li Ewropayê rekor e, ew bi beşdariyeke wisa mezin serbilind û hêvî dikin îsal dê beşdarî zêdetir bibe.

'Bila dozger paşê dozê venekin'
Piştî Kavukçuoglu, kordînatora fûarê Cemran Oner der barê nanveroka fûarê de agahî dan û paşê Serokê TYB'ê Kenan Kocaturk axivî. Kocaturk pêşî bal kişand ser 70'emîn salvegera îmzekirina Danezana Mafên Mirovan û di vê çarçoveyê de li ser du xalên bingihîn ên mafan sekinî û got: "Yek jê mafê nivîsandin, belavkirin û azadiya ramayê ye, xala din jî mafê telîfê ye. Divê civak bi awayî azad beşdarî beşa weşangerî bibe, ji aliyê madî manewî ve mafê xwe biparêze. Tê zanîn di xala dozgeriya çapemeniyê de heye, dozger dema pirtûk derkeve di 6 mehan de lê dinêre dozê vedike, lê niha carinan paşê jî dozan vedike. Em hêvî dikin dê dawî li vê yekê bê. Ji aliyê telîfê ve jî, dijî weşana dîjtal û çapa korsan a pirtûkan em ji wezaretê hêvî dikin ku zagona telîfê derxin."
Kocaturk qala welatên OCD kir ku di nav 72 welatan de Tirkiye di warê fêmkirina ji xwendina xwe de di rêza 52'yan de ye û bal kişand ser xala xwendin û jê fêmkirin. Kocaturk îstatîstîkek wisa da: "Dema dê û bav ligel zarok dixwînin zarok di 13 saniyeyan de tê digihê lê li cihê çanda xwendinê nebe ev têgihîşt digihîje 45 saniyeyan. Lewma jî gere em çanda xwendinê pêş bixin.

'Bila pirtûkxane pirtûkan bikirin'
Serokê TYB'ê Kocaturk banagî wezaretê kir ku ji bo pirtûkxaneyan ji weşangeran pirtûkan bigirin û li ser fermannameyên wezaretê ku di serdema destpêka xwendinê de derdixe jî got ku bi vê fermana ku derxistine dest ji firotinê berde, weşanger êdî nikarin li dibistanan pirtûkên xwe jî bidin nasîn.
Kocaturk li ser bilindbûna dovîzê û bandora vê ya li ser weşangeran bibîr xist û got ku ji ber vê yekê îsal di warê çapkirinê de sedî 1-2 daketin çêbûye. Her wiha da warê çapkirina pirtûkên ji bo zarokan de jî paşketine girîng heye. Kocaturk wisa got: "Saziya çêkirina kaxiz SEKA dikaribû bê pêşxistin lê nekirin. Ji ber vê niha weşanger di warê kaxiz de zehmetî dikişînin. Niha divê em SEKA'yê nîqaş bikin. Yan dewlet bi xwe SEKA'yê veke, yan bi awayekî bide vekirin ku ne di qada navneteweyî de be jî, li vir piyaseya kaxiz pêş bixe.!
Her wiha Kocaturk bal kişand ser bacê ku weşanger di bin baceke giran de ne û di vî warî de qala rewşa giran a nivîskar û wergêran jî kir: "Ji pereyên ku nivîskar, wergêran bi dest dixin sedî 35 ji wan wekî bac bi paş ve tê girtin. Cotkar, esnaf ji bacê muaf in, bac ji wan nayê girtin lê çima ji wergêr û nivîsakaran sedî 35 bac tê girtin. Em vê tînin ziman, wezaret dibêje em li ser disekinin lê çareser nabe, ev pirsgirêk dê kengê çareser bibe?"
Dûre şêwirmendê fûarê Dogan Hizlan û paşê jî Mêvanê Rûmetê yê fûarê yê îsal nivîskar Selîm Îlerî axivî. Îlerî bal kişand ser xwendinê, diyar kir ku Ataturk di dema li eniyê bû jî "Çali Kuşu" yê Reşat Nuri Guntekin dixwend û got: "Deynê me ji dil ji bo Çali Kuşu heye."

800 weşanger û saziyên sivîl
Îsal heta 18'ê mehê dê fûar bidome. Di fûarê de li dor 800 weşanger û saziyên sivîl standan vedikin. 8 weşangerên kurdan hene. Di çarçoveya fûarê de li dor 300 çalakî wekî panel, gotûbêj dê li dar bikevin.

**

Nûçeyên Eleqedar:
- Hinek çalakiyên li TUYAP'ê, tenê yek bi kurdî heye
- Vane weşanxaneyên kurdan ên beşdarî TUYAP'ê dibin