Diyarname
Kovara Tîrojê bi hejmara xwe ya 41'ê derket pêşberî xwendevanên xwe. Kovarê çavên Ceylan Onkula hat kuştin kiriye bergê xwe.

Kovara Tîrojê ku du mehan carekê bi kurdî û tirkî weşana xwe dike bi hejmara xwe ya sermawez û berfanbarê derket pêşberî xwendevanên xwe. Kovarê çavên Ceylan Onkula ku li Licê bi guleyeke topê hate kuştin kiriye berga xwe, di berga dawî ya kovarê de jî xêzkar Halil İncesu dîsa li ser Onkulê xêzeke çêkiriye.

Di dosyaya vê hejmarê ya kovarê de jinan meseleya 'pêşîlêvekirina pirsgirêka kurd' girtiye dest. Nivîskar û sosyolog Oya Baydar, helbestvan Sennur Sezer, nivîskar û rojnameger Yildiz Ramazanoglu, akademîsyen Esra Arsan û hunermend Feryal Oney li ser meseleyê sekinîne û fikrên xwe anîne ziman.

Di kovarê de hunermend Vedat Yildirim li ser "Muzîka kurdî û pirçandî" nivîseke nivîsandiye, herêm bi herêm hin dîtinên xwe aniye ziman. Wî ji hozanên gerok, heta ribaban, heta meqamên olî hin notên xwe yên ku ji tecrubeyên xwe yên salan girtiye pêşkêş kiriye.

Di vê hejmarê de yek jê bi tirkî, didu jî bi kurdî hevpeyvin hatine weşandin. Ya tirkî bi parêzer Firat Aydinkaya re li ser zagona bingehîn û meseleya civakê hatiye kirin. Di hevpeyvînên kurdî de jî Lal Laleş bi nivîskar Îrfan Amîda re li ser pirtûka wî ya dawî "Zaremya"yê; Sînan Danaci û Pinar Akalin jî bi şanoger Mîrza Metîn û Berfîn Zenderlioglu re li ser şanoya wan "Reşê Şevê" hevpeyvîneke kiriye.

Şehmus Diken jî li ser Sînemaya Dîlan a Amedê ku piştî êdî kilît li deriyê xwe dide nivîseke nostaljîk nivîsandiye.

Hakki Ozdal, Bariş Avşar, Ali Fikri Işik, Sami Tan, Sibel Ozbudun, Ahmet Tulgar, Mukit Arslan, Fatih Polat, Çiya Mazî, Cuma Boynukara, Veysel Otunç, Tevfik Taş, Receb Dildar, Sedat Karakaş, Heval Evîndar, Kemal Înal bi nivîsên xwe beşdarî kovarê bûne.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.