Diyarname
Rewşenbîrê kurd Sait Bingol ku ji Doza 49'an hatibû darizandin roja 1'ê vê mehê li Elezîzê jiyana xwe ji dest da.

Di nav dîroka kurdan de Doza 49'an ciheke taybet digire. Yek ji endamên vê dozê jî Sait Bingol bû. Bingol ku di sala 1934'an de li Çewligê hatibû dinê, piştî qedandina Lîseya Ziya Gokalp a li Amedê di sala 1955'an de derbasî Zanîngeha Stenbolê Zankoya Îktîsadê bûbû. Di wan salan ku nû nû xwendekarên kurd berê xwe didin zanîngehan de ew li Dicle Talebe Yurdu dimîne.
Binol demekê Di Diyarbakır Yuksek Ogrenim Dernegi de dixebite, demekê jî serokatiya komeleyê dike. Bingol ku her diçe hay jê çêdibe ku xebat rê li ber xwendekaran vedike, ew û hin hevalên xwe "Bingol Yuksek Ogretim Dernegi" vedikin ku ew jî di nav avakarên wê de ye. Di salên ku pîrozkirina Newrozê ne serbest de Sait Bingol di sala 1956'an de yekem car li Heybeliadayê (Giraveke li nava sînorên Stenbolê de ye) agirê Newrozê pê dixe û Newrozê pîroz dike.
Bingol di nav Doza 49'an ku di 17.12.1959'an de dest pê dike cih digere û tê darizandin. Bingol ku tê girtin di Hucreyên Harbiyeyê (ev der li Stenbolê ciheke leşkeriyê ye) dimîne.

Rewşenbîrê kurd Sait Bingol ku piştî tê berdan jî têkoşîna xwe didomîne ev demekê bû ji ber nexweşiya qansêra rûviyan dihat tedawîkirin. Sait Bingol ku bavê 6 zarokan bû roja 1'ê mehê li Nexweşxaneya Damla ya li Elezîzê wefat kir.

Têbiniya Diyarnameyê: Me fotoyê Sait Bingol ji Ozgur Polîtîkayê girt